Vastelaovend same!

’t Is weer zoe wied: Limburg duuk drei daog oonder in de vastelaovend. Veer wete tot boete de provincie väöl misverstande bestoon euver wie veer dat fies viere. Esofste inkel este stroontzaat bis daovaan kins genete. Veer wete wel beter. De fèlm “Nao ’t Zuuje” euver de Venlose vastelaovend mèt stadprins Lex Uiting in de hoofrol, heet ’t vastelaovendsgeveul op ’n fantastische meneer weergegeve. D’n TV-recensent vaan de Volkskrant sjreef tot heer nao aonleiing daovaan “bekans” zin kraog um mèt te doen. Lei Meisen twitterde dao-op vaanoet Nui Zieland tot dat noe ouch weer neet de bedoeling waor.

Wie daan ouch: veer zien e paar daog neet te bereike. Vaan de Olympische Winterspeule zalle veer woersjijnelek neet al te väöl mètkriege. Meh vastelaovend is ouch e bitteke topsport este dat good wèls viere. Um ’t mèt ’n aajd Mestreechs leedsje te zègke:

Zèt dien zörg op zij en gaank oet mèt die daog
Dans en spring in ’n rij en vergeet al dien plaog
Ofste aajd of joonk bis, zingk mer allemaol
Hup Marjenneke, Pup Marjenneke, Leve de Carnaval

Mèt ander wäörd: goejt uuch dedoor!