Veldeke Declamatiewedstried 2018
Veldeke Limburg organiseert idder jaor ein declamatiewedstried veur kinder van de basisschoeël. In verschillende laeftiedscategorieën kómme de lierlinge van verschillende schoeële op de buun um eur dialek-teks (proza of poëzie) veur te drage.
De finale zal dit jaor plaatsvinde op zaoterdaagmiddaag 26 mei in DOK-6 in Panninge, aanvang is um 13.00 oor. D’r doon weer 25 kinder mei van groep 3 t/m 8. Vanoet de ganse provincie kómme dan waer de winnaers van de veurróndes nao de theaterzaal um eur gedichte te laote hure en zeen aan ‘t publiek en netuurlik ouk aan de viefkoppige jury.
Dit jaor besteit de jury oet;
Sef Peeters, Schriever van verschillende revues veur ’t Volkstheater Frans Boermans in Venlo en speuler in verschillende stökke.
Katja Henz, Katja is veural bekint van eur vastelaovesleedjes waomei zeej al 3 kier de finale van ’t LVK wis te bereike. Maar Katja haet vuuel mier te beje ze haet al diverse Limburgse CD’s gemak.
Ton van de Wijngaard, streektaalfunctionaris, Ton ontwikkelt same met Veldeke Limburg en de raod veur Limburgs activiteite die gerich zien op de streektaaleducatie en ónder de aandach bringe en laevend halde van de Limburgse taal.
Anke Peters, Anke speult regelmaotig mei in tenielstökke en de Heiligdomsvaart in Zöstere. Anke haet zelf 5 kier meigedaon aan de declamatiewedstried van Veldeke en woort 2 kier Limburgs kampioen.
Hortense Brounts, veurzitster van de jury, Hortense speult teniel en cabberèt met Veldeke en is pas weer beneump as veurzitster van Veldeke kring Mestreech.
Tiedes ’t jury beraod kriege weej ein act van Niels Sievers oet Zitterd. Niels is gebaore op 5 mei 2004 in Zitterd. Wie hae 6,5 waas is hae begós beej GL-productions in Zitterd en met 8 jaor is hae begós met zangles. Sinds november 2014 traed hae regelmaotig op via Kunstbende. Niels haet in 2017 meigedaon beej The Voice Kits wao haet in de Sing Off is gekómme. Ein dink is zeker, optraeje veur publiek vind hae ’t leukste waat d’r is en of det veur 10 of 10.000 minse is mak um niks oet.
De prissentasie van deze midaag leet weer in hand van Hans Jacobs dae det op ein fantastiese meneer duit en de kinder ouk wet gerös te stelle zoedet zeej vol vertrouwe eur gedichje kinne veurdrage.
(Venloos)