Veldeke Krink Remunj viert 90 Jaor Veldeke

Veldeke Limburg besjteit 90 jaor. De Krink Remunj haet daoróm op zaoterdaag 10 en zóndaag 11 december ein biedraag geleverd aan de Remunjse Geis zingk Kèrs.’t Waas ein sjitterend program in de Oranjerie mit fantastiese artieste: ein Kombo en ‘t Koor ‘de Remunjse Geis’ o.l.v. Tim Giesbers, ‘de Phil Harmonie’ oet Neel o.l.v. Sander Simons en ’t Kienjerkoor ‘Nekizi’ oet Naer o.l.v. Wilma Verheyden. Ouch waerde d’r ein Kersverhaol veurgedrage door Hans van Bergen, oze Remunjse sjriever en dichter. En det waas nog neet alles want ein Belzje Zandjmuze, Colette Dedeyn, beelde mit zandjsjilderinge det ganse Kersverhaol oet. Twee veursjtellinge wo ’t pebliek geweldig van haet genaote. En omdet Veldeke Limburg jäörig waas moch van oos HB ein kedootje waere gegaeve. Ederein dae det wól kreeg ein graties lidmaatsjap veur 2017 aangebaoje.  En óm oos eige leje neet tekort te doon krege die as kedootje veur ónger de Kersboum ’t book ‘Ónger de Kristóffeltore’ aangebaoje. Ouch höbbe veer eine Sjeurkelender veur 2017 oetgegaeve. Dae Sjeurkelender kint waere besjteld en aafgehaold bie de Póppedokter op ’t Munsterplein van Remunj.

 

← Ga terug