Veldeke Limburg oeuvrepries 2025

P E R S B E R I C H

Zanger, gitaris en leedjesschrijver Ben Erkens oet Geleen óntvingk dit jaor de Veldeke Oeuvrepries. Det woort zaoterdaagmiddaag 31 augustus bekindgemak in ein speciale oetzending van ‘t L1 Radio-programma Plat-eweg.

Gelaendenaer Ben Erkens (72) mak al ruum 50 jaor leedjes in de Limburgse taal. Hij makde eind jaren zeventig deil uit van de legendarische groep Carboon en schreef ‘t LVK tösse 1979 en 2005 vief kier op ziene naam. Met zien band Valsj Plat coverde hae twiëe decennia langk Rolling Stones-nummers in ‘t Gelaens. Ouk de verschillende revues in (Alt-)Gelaen woorte door Erkens van leedjes veurzeen. Ben Erkens schrief ouk vuuel en gaer veur andere Limburgse artieste: Anja Bovendeaard, Bruno Majcherek, Frans Theunisz, Thei en Marij, Frans Croonenberg en Beppie Kraft make gaer gebroek van zien deenste op meziekgebied. Zoeë is d’n evergreen In d’n Hiemel van Ben’s hand.

Depere laog
‘t Juryrapport motiveert de keuze veur Erkens ónder mier as volg: “De beteikenis van Ben en ziene meziek is blievend. Det kump veural umdet hae zien leedjes schrief en zingk vanoet ein depere laog. Zien tekste en melodieë zien oet volle euvertuging en met aandach gemak. Ben wet ‘t collectieve geveul van Limburg te raken en te verwaorde en daomei leedjes te bringe die tiedloos zien.”

Carboon
De Veldeke Oeuvrepries wuurt sinds 2007 uitgereikt door Veldeke Venlo. Vanaf 2023 is Veldeke Limburg verantwoaordelijk. De jury wuurt dit jaor gevormp door René Haustermans (veurzitter), Chantal van Zundert, Ivo Rosbeek en Cyriel Achten. Bas Vissers, bestuurslid van Veldeke Limburg, prees de laureaat: “Weej waere regelmaotig getip door deze en gene det er in de Westelijke Mienstreek emes róndlöp dae deze prijs zeker eine keer zoel verdene. Ouk ‘t feit det weej ‘t belangriek vinde um de ganse provincie te bestrieke met deze pries, speulde zeker mei in de veurdrach van de jury veur Ben Erkens. Beej ós in Venlo hebbe we de Vrijbuiters, maar in de Mienstreek hebbe ze neteurlik de groep Carboon”, besluut hae met eine lach.

400 leedjes
Erkens zelf is erg vergöld met dees erkinning. “Met nao schatting 400 wies 450 leedjes van mien hand kins se allewiels waal spraeke van ein oeuvre, jao”, grap Ben. Gevraog nao ein van de beste leedjes van zien hand, kump hae met Same doert mer aeve op de proppe. “Ik schreef ‘t voor eine vrind van mich, Peter Camps. ‘t Is ein van de weinige leedjes die ik binne inkele minute schreef. Wie ik de pen op ’t pepeer zat, schreef ‘t zich as vanzelf.” Oetintelik makde Conny Peters d’r ein carnavalesk arrangement beej en behaolde ‘t ein finaleplaats in ‘t LVK van 1998.

Nach
De pries wuurt traditioneel oetgereik tiedes of rónd de Nach van ‘t Limburgs Leed in Venlo. Dit jaorlikse dialekmeziek-evenement vindt plaats op zaoterdag 20 september in de Venlose binnestad. In de ganse stad traeje euveral Limburgse artieste en bandjes op.

Ierelies Veldeke Oeuvrepries
2007 Jan Theelen
2008 Hannelore Winter
2009 Wooden Chain
2010 Sjef Diederen
2011 Ben Verdellen
2012 Nol Wassen
2013 Guus Smeets
2014 Um & Um
2015 Jack Vinders
2016 Thei en Marij
2017 Henk Steijvers
2018 Gé Reinders
2019 Neutjesrang
2020 Arno Adams
2021 Ton Engels
2022 John Coenen
2023 De Drekskaters
2024 Minsekinder
2025 Ben Erkens

Op foto 1 zeet geej Ben Erkens, umringk door René Haustermans, veurzitter van de jury, Bas Vissers (Bestuurslid Veldeke Limburg) en Finbar van der Veen (Bestuurslid Stichting Nach van ‘t Limburgs Leed) (foto: Henk Hover L1)
Op foto 2 zeet geej Ben Erkens umringk door zien muzikale vrinde van ‘t verrassingscombo det veur ‘m speulde beej de bekindmaking van d’n oeuvrepries 2025
Op foto 3 zeet geej ‘t door Marielle Fransen gemakde beeldje det zeej speciaal veur Ben Erkens veur dees gelaegenheid haet gemak.