Veldeke Limburg zeuk ’ne redacteur

Veldeke Limburg is ‘n vereineging die ziech inzèt veur ’t behaajd en bevordere vaan de Limburgse taol. Mèt zien 10 lokaol Veldekekring die verspreid zien euver de ganse provincie, vörmp ze ouch de groetste organisatie op dat gebeed in Limburg. Veldeke moot ’t höbbe vaan vrijwèllegerswerk, vaan lui die bereid zien oet leefde veur ’t Limburgs ziech belangeloes in te zètte op tal vaan terreine. Ein vaan die terreine is de communicatie.

Momenteel zeuke veer iemes dee ziech in wèlt zètte veur de redactie vaan eus Jaorbook. Die redactie kint nudeg verstèrking gebruke umtot recentelek e paar lede door versjèllende reie zien weggevalle.

Boe-aon zouw ’ne nuie redacteur leefs mote voldoen?

Leefde veur de Limburgse taol steit veurop; dezoonder geit ’t neet.
Achtergroond mèt ’n taolkundege opleiing of ervaring is aon te raoje.
Bereidheid um (hiel) get eurkes in ’t werk veur Veldeke te steke veur euverlègk mèt de ander redactielede (eder twie maond in Remund), benaodere vaan sjrijvers, corrigere vaan tekste en zoe wijer.
Kinnes vaan of op z’n mins e positief ziech op de variëteit aon Limburgse dialekte.
E breid nètwerk vaan dialeksprekers en -sjrijvers binne de provincie strek tot aonbeveling.

Dat is allemaol neet niks meh veer zègke lever boe ’t op steit es tot veer iemes mote teleurstèlle. Es de kandidaot daan ouch nog get verstand heet vaan CMS (content management systeme) of DTP (desk top publishing) zouwe veer gans content zien meh dat is gein vereiste; dat liere veer häöm of häor nog wel. Wat dat ‘häör’ betröf: vrouweleke sollicitante höbbe e striepke veur want de redactie besteit noe allein oet manne.

Wat höbbe veer te beeje?

Wie gezag: riek zalt geer neet devaan weure. De functie is oonbezoldeg. Wel vergeuje veer alle koste (reize, faciliteite, programma’s etc) die gemaak weure veur ’t redactiewerk.
Wijer garandere veer uuch samewèrking mèt lui die ziech mèt hart en ziel inzètte veur de Limburgse taol, zoonder tot dat tot fanatisme leit: ’t moot wel leuk en gezèlleg blieve.
Geer zalt kontakte lègke mèt intrèssante lui binne de ganse provincie die ziech mèt alderhand aspekte vaan ’t dialek bezeg hawwe.
Geer zalt samewèrke mèt professioneel mètwerkers vaan ’t Hoes veur ’t Limburgs die ’t vrijwèllegerswerk oondersteune.
Geer höb de meugelekheid um eur werk oet te breie nao ander oonderdeile vaan de communicatie vaan Veldeke Limburg, zoe wie de website, de Nuutsbreve en ander touwkomstege publicaties. Zoe blijf geer op de huugde vaan alle politieke en taolkundege oontwikkelinge die ’t Limburgs momenteel doormaak, en dao gebäört allewijl ‘ne hielen houp.
En neet es mins belaankriek: geer dreug bij aon ’t behaajd en ’t bevordere vaan eus sjoen Limburgse taol. Dao zalle volgende ginneraties Limburgers uuch daankbaar veur zien.

Wèlt geer in aonmèrking koume veur ’t werk es redacteur vaan Veldeke, sjik daan ’ne mail mèt eur kwaliteite, ervaring en eventueel referenties nao Bas Vissers, lid vaan ’t provinciaol bestuur vaan Veldeke Limburg: bas.veldekevenlo@gmail.com.

Veer kieke oet nao eur reactie!