Veldeke Wieërt levertj weer 20 cursiste Laeze & Schriêve aaf

Veldeke Wieërt levertj weer 20 cursiste Laeze & Schriêve aaf
Woonsdig 1 april (!) kos oeëze ‘meîster’ Frits Nies tot besloêt vanne vuuërjaorscursus Wieërtlands Laeze & Schriêve aan 20 enthousiaste cursiste ‘t Getuûgschrift uutreîke. Dit gebuuërdje nao ‘t vuuërlaeze en bespraeke vanne léste léstaak, de doeër de deîlnemers zelf geschrieëve ‘meîsterwêrke’. De resultate wore hieël good en ouch weer verrassendj.

Besteur
In Keenter Hart woor ditskieër ouch ‘t besteur d’rbeej van Veldeke Krînk Wieërt. Sieër de algemein ledevergadering van indj mieërt és dit weer op volle stêrkdje. Now zeen de besteurslede Rob Hermans en Frits Nies. Diëze léste és medein ouch de nowwe vuuërzitter, oppe stool dae vacânt woor vanaaf det Jan Feijen in januari 2024 és oeëverlieëje. Oeës besteur bestieët wieter uut Toos Hompes (sikkretaris), Wilhelmien van Houten (penningmeîster) enne lede Lee Timmermans en Naud Aendekerk.

De volgendje cursus Wieërtlands Laeze en Schriêve startj nao Wieërt Kêrmes, in oktoeëber.

Aanmelle kân al via info@veldekewieert.nl