Veldgewas: Felix Stelten gestorve

Felix Stelten is op dinsdag 26 miert gestorve in Zitterd, in Huize de Kollenberg. Felix waor performer pur sang, sjèlder en diechter. Zien performances waore oonorthodox en soms oonnaovolgbaar, meh de taol stoont veurop. Heer traoj dèkser oop mèt ziene kammeraot Henk Eberson. Same vörmde zie ’t notoir ‘poëzie-commando’.

Daoneve doog heer mèt aon pitpoézie: 12 Sittardse diechters gónge los, boe-oonder Felix. Dat waor häöm wel touwvertrouwd. Ouch ‘beeld’taol intrèsseerde häöm in hoeg maote es getalenteerd teikeneer en sjèlder. Dao waore door de jaore versjèllende exposities vaan zie werk.

Felix sjèldert noe in d’n hiemel, mèt (zelf verzonne) wäörd en mèt dikke verfklódders. Maag heer röste in vrei, sakkerju.

Wim Kallen

• In 2015 publiceerde ’t cultuurmagazine ZOUT ’n interview mèt Felix Stelten. Geer kint dat nog ins naoleze door hei te klikke.
• Felix Stelten sjikde ouch regelmaoteg gediechte op nao de redactie vaan Veldgewas. Veer höbben ‘rs twie oetgezeuk oet 2018 en laote die hei volge

Felix Stelten: Zelfportrèt

eine veur de lente

kiek nao diene boew
kom tied tekort
aom dich laevend
ben neit sjoew veur te kalle
sjmiet dich vól mit gekleurde weurd
wil gein pauze
laot mien vingere bie dich,
doe sjöddels dien kóntj
dien mee fabbreseert ei ritme
meziek zónger note
‘t bevrus op de plaatsj
sjnie mit mien henj door die kaw
wil neit det ’t sjtop
maak er eine magische maord van
sjamanistische klanke traeje nao boete
de zeel nao de dood
le petit mort
mörge is noe al veurbie.

Félix Stelten
in Veldgewas maart 2018

eine veur deze zomer

mien ouge pakke dien maote
maete
begriepe diene boew
ich ken dich sins miene verjäördig
vingesj weite eine waeg
zuike det eine zónger verangering
en
toch ein taal
kómpleet nuuj

heur dien lief
ben zo dich biej dich
laot de mörge mae komme dees nach is van mich
blink wie kirmes

ich sjlenter in miene laere jas
pak ein buks
raak piepkes
haol dich neit in
kom dich taenge
höb nog penninge in mien tesj.

Felix Stelten
In Veldgewas april 2018