Veldgewas: Godelieve van Gemen leus häör gediech ‘De ierste zjwarte örges’

In d’n decembernómmer vaan Veldgewas 2023 steit e gediech vaan Godelieve van Gemen oet Baolder. D’n titel vaan häör gediech is “De ierste zjwarte örges”. Godelieve heet häör gediech veur Veldgewas ouch ingesproke. Geer kint ‘hei beluustere en d’n teks dao-oonder volge.

De ierste zjwarte örges

witminse keke sjtrang gerich op eur wiej zeej dao leêp
ziej aan ziej
mit ein gebrónsde vrouw
‘de ierste zjwarte in dörrep’,
dóch zeej as vanzellef
‘broên en brónskleurig,
nae zjwart is zjwart’, dóch zeej
wiel zeej zjwaor döbbend
kwaam gegaon

—

de meiste minse dao wao zeej laef zien verkes-kleurig
wiel den eine of den anger
is getaoge mit ein vel
broênsig wiej hazelneutjes
wiej de uigskes van den Haas
mit häörkes zjwart wiej Däölkes
doe waar ’t wao zeej versjtóng
wat ’t is um örges
en nörges thoês te zien

—–

Amina Hinde Noor van de Isaaq-clan
vurhaer sjieëper van Kemiêle
waar heej de ierste zjwarte
zaoch traejend vroom
ziej aan ziej mit diej
nag noeëts zoê emes waar heej gezeên
doe, in negetienhóngerd negetig
vur get ampel jaore truuk

—

al is noow alles angers angers
‘t verdeile ‘t indeile ‘t inkleure
is gewaore, verwaore
vurbeej de sjaam

‘ach, laot baeter mer
gen minse miêr gebaore waere’
sjreêf de misantroop

Godelieve van Gemen