Watbleef – de Limburgse Podcast app
Watbleef?!: ‘t platform vuur Limburgse podcasts
Watbleef?! is e nuj online platform dat alle Limburgse podcasts op eng plek samebringt. Van culturele tradities tot actuele verhaole: Watbleef?! is d’r Limburgse Podcast Hub. E initiatief van de sjtichting LIMx, mit es doel Limburgse podcasts herkinbaar en mekkelik veendbaar te make.
Limburgs loestere zoonder verdwale
Podcastleefhebbersj dwale diks eindeloos uver platforms es Spotify, op zeuk nao Limburgse content. “Zeuke nao Limburgse podcasts op Spotify is es zappen op Netflix: de guufs ’t op vuur daste begins. Gelukkig is d’r Watbleef?!,” zaet initiatiefniëmer Harry Rouschop, zelf ervaren podcastmaker.
Rouschop realiseerde series zoe-es De Limburgse Taal & …, Keenderbeuk en Hommage aan Sef Pijpers. Mit Watbleef?! zit ‘r, same mit de sjtichting LIMx, d’r volgende sjtap: “’ne podcast make is seempel. Gehuurd wure, dát is de oetdaging.”
Die uvertuiging ontwikkelde zich oet persuunlikke ervaring: “Ich mirkte dat ‘t aantal streams van mieng podcasts e paar wiëke nao de lancering sjtèrk truukleep, en vroeg mich af: wie hilste ‘ne podcast oonder de aandacht? Tegeliëk waor ’t zeuke nao Limburgse content ‘n frustratie op zich. Zoe is Watbleef?! ontsjtande.”
Eng plek vuur alle Limburgse verhaole
Mit Watbleef?! kriege Limburgse podcasts eindelik de zichtbaarhaed die ze verdene. ‘t Platform bevat:
• Podcasts van Limburgse makersj
• Podcasts in ‘t Limburgs dialect
• Podcasts uver Limburgse thema’s
De podcasts zien uverzichtelik gesorteerd op titel, maker, locatie en publicatiedatum. Daoniëve zien ze ingedeld in thematische rubrieken zoe-es dialect, sjport, meziek, keuns & cultuur, vastelaovend en entertainment.
Sjtichting LIMx wil mit diet initiatief biedrage aan ‘t behoud van ‘t Limburgs immaterieel cultureel erfgood. Makersj én loesterers wure samengebrach op e toegankelik, uverzichtelik én gratis platform.
Oag vuur makersj
Watbleef?! is d’r neet alleng vuur loesterers, meh aog vuur makersj. Podcasts die wure aangemeld via www.watbleef.nl kinne extra oonder de aandach gebrach wure. Aog is d’r aene korte Watbleef?!-promo besjikbaar, dae doër podcastmakersj gemonteerd kint wure in hun aflieveringe. Zoe promote ze oonder-aen hun wèrk en versjterke ze same ‘t bereik van Limburgse podcasts.
Same maak v’r ‘t compleet
Watbleef?! is altied in ontwikkeling. LIMx reup daorum podcastmakersj én loesterers op um Limburgse podcasts die nog oontbriëke, aan te melde via d’r website. Zoe ontsjtaet e compleet en liëvend uverzich van Limburgs loesterplezeer.
Lancering en ambassadeurs
‘t Nujje platform woerd officieel gelanceerd in ‘n oetzending van Plat Eweg, ‘t L1-dialectprogramma van Henk Hover. Vuur datzelfde programma makt Harry Rouschop maondeliks ‘n podcastrubriek oe-ien ‘r de nujste podcasts besjpriek. Daarniëve kreit Watbleef?! sjteun van versjillende ambassadeurs, oe-oonder:
• Millie – d’r jongste podcastmaker van Limburg
• Lotte oet Limburg – jeugdige Limfluencer
• Bart Storcken – muzikant en presentator
• Marc Hermans – cultureel doezendpoet
Uver Sjtichting LIMx
Watbleef?! is ‘n initiatief van de Sjtichting LIMx, ‘n sjtichting die zich inzit vuur ‘t behoud van Limburgs immaterieel cultureel erfgood. LIMx organiseert projecte en samenwèrkinge die biedrage aan de zichtbaarhaed, sjpreiding en toekomst van de Limburgse taal en cultuur.
Initiatiefniëmer Harry Rouschop makde ierder o.a. de podcasts De Limburgse Taal & …, Keenderbeuk en Hommage aan Sef Pijpers.
Contact voor de pers
Harry Rouschop 06-51544004
harry@watbleef.nl www.watbleef.nl