Zaoterdag 22 fibberwarie Live oetzending Plat-eweg: daag vaan de Moojertaol

Plat-eweg is ’t dialekprogram vaan Limburg, samegestèld en geprizzenteerd door Henk Hover. Edere zaoterdag vaan 13.00 tot 16.00 oor. D’n daag nao d’n Daag vaan de Moojertaol steit Plat-eweg in ’t teike vaan dezen Daag vaan de Moojertaol.

De vrijwèlleger in ‘t zunneke

Dit jaor viere Veldeke Limburg en ’t Hoes veur ’t Limburgs d’n inzat vaan de vrijwèlleger. ’n Actief taolgemeinsjap die ziech inzèt veur de borging en euverdrach vaan lokaole kinnes vaan de Limburgse taol is naomelek vaan groet belaank veur de touwkomsbestendegheid vaan ’t Limburgs.

De Limburgse taol kint zoe’n actief taolgemeinsjap. Ein die ziech op alderhand menere inzèt veur de taol. De tien Veldeke Kring zien dao ’t bekindste veurbeeld vaan. Edere krink spant ziech in um binnen zien eige stad of regio ’t plaotselek dialek op de kaart te zètte.  Dat doen ze door alderhand activiteite te oontploeje, zoewie dialek-cursusse, veurstèllinge, excursies, dialek-aovende en ’t oetgeve vaan beuk in ’t dialek.

Ouch boete de bekinde dialekvereineginge zètte Limburgers ziech in veur de taol. Vaan ’t make vaan podcasts tot ’t oontwikkele vaan kinderbeuk en kwartètspeule en ’t beplakke vaan plaotssjèlder tot ’t make vaan dialekmeziek.

Zaoterdag 22 fibberwarie (13.00-16.00 oor): Live vaanoet Hoes veur ‘t Limburgs

In dees oetzending vaan Plat-eweg geit Henk Hover vaanoet ’t Hoes veur ’t Limburgs in gesprek mèt versjèllende vrijwèllegers oet de ganse provincie en zalle artieste live meziek laote hure. ’t Program vaan de oetzending is tot stand gekoume in samewèrking mèt Veldeke Limburg en de lokaol Veldekekring.