Zoe kinste ouch dialek oonderzeuke en dao euver publicere

Aon de universiteit vaan Groninge doen ze oonderzeuk nao dialekte door de moondbeweginge vaan sprekers zoe exact meugelek in kaart te bringe. Martijn Wieling is universitair docent informatiekunde en heer gebruuk ‘n technische methood um die moondbeweginge te registrere. Heer oonderzeuk de dialekte dus neet op basis vaan opgenome spraok meh kiek nao wat dao in de moond gebäört vaan iemes dee dialek sprik. Wie de tong beweeg en wie dat versjèlt aofhaankelek vaan ’t soort dialek. Zoe hoop heer inziech te kriege in de variatie tösse de menere boe-op lui spreke.

Esof dat nog neet bezunder genóg is, heet heer ouch nog ’n bezunder meneer bedach um de rizzeltaote vaan zien oonderzeuk te prizzentere. Dat deit heer neet wie gebrukelek in de vörm vaan e wetensjappelek rapport meh mèt e stripverhaol. Zoe dwingk heer ziechzelf um alles wat heer oet dat oonderzeuk opstik, zoe einvoudeg en begriepelek meugelek op te sjrieve. Veer wete neet of ’t Limburgs ouch in zien oonderzeuk betrokke is meh voonte ’t verhaol intressant genóg um wijer te vertèlle. Bekiek hei ‘t fèlmke boe-in Martijn Wieling oetlègk wie en en ander wèrk.

(Mestreechs)

← Ga terug