Ós Modesjtaal, column van John Hertogh, december 2025

Ein rubriek euver ’t gebroek van ós modesjtaal, dialek, plat, Limburgs door  John Hertogh oet Zitterd – dec 2025 nr. 73

De lètste Ós Modesjtaal van 2025.

D’r is aafgeloupe jaor beheurlik väöl aandach aan Ós Modesjtaal besjtaed, behawve, vènj ich,  in die Limburgse gezèt! ’t Kómmend jaor wil ich get mee van mich laote heure en veural laote laeze. Dits keer ein sjtök mit get nuuts en get awds. Ich begin mit get awds:

Leise rieselt der Schnee.

’t Gevuil dat get zach van diene rök aafvilt of aaflitsj, nuime veer soms rille. Väöl luuj geneite dao van. Dat woord rille kump van ruzele. Ouch es de sjnee zach, roesjend ómleeg vilt vintj me dat fejn. Zo fejn, dat Eduard Ebel (1839-1905), eine protestantse Pfarrer en dichter oet Graudenz ( Pole) dao in 1895 ein leidje euver sjreef : ‘Weihnachtsgruss’. Geer kènt ’t allenej es ‘Leise rieselt der Schnee’.  Noe op väöl plaatsje de krisverseiering al wurt opgehange, zal ’t neit lang mee doere pès veer dat leidje in de sjtraote en gesjefte gaon heure. En haopelik gaon de krisbuim neit te vlot ruzele! Euveriges, dae Pfarrer is goud betaald gewore veur zien leidje. Zien dochter kreeg nog lang de jaorlikse 55.000 Mark van de Dutsje Buma/Stemra!

Truu Ruzel en Bèt Laek.

Riesele, ruzele, da’s femieje vanein. Truu Ruzel en Bèt Laek ouch?? Die twee waere meistes in eine aom genuimp  Of ’t waor is weit ich neit, mer dat sjiene twee vrouwe te zeen gewaes, wo bie ein sjteekske los zout. Ze hawwe heugswaarsjienlik ouch gein haore mee. Wo dae naam Ruzel haer kump, sjnap ich waal, mer Laek?  Kump laek van lekke? Ich wil mich dao-euver neit ensjele of zaege. Wós geer trouwes dat ’t woord zaege mer ein letter sjaelt mit zaenge. Euver zaengene lous ich ein awd gezègkde: God zaengent dich mit de hónderddoezend en ei mendje kleingeldj, dan houfste neit drek te wissele. Dat gebroekde me vruiger in plaatsj van ‘gezóndjheid!’ es emes neisde. Da’s get angesj es: Hae heurt de vleu neiste en zuut ‘t graas wasse. Dat beteikent: Hae maak euveral ein perbleem van. Sjoon toch dat woord perbleem (ipv prebleem), sjus wie perbeiere (ipv prebeiere), percent (ipv precent), percessie (ipv precessie) en perfiet (ipv prefiet).

Ich gaon neit langer mee palavere: Ich wunsj uch noe al: ’t Allerbèste veur ’t nuut jaor en nog bedank veur ’t laeze en reageiere!

De volgende  Ós Modesjtaal, versjient  in 2026.  johnhertogh@gmail.com .