Sjrieve euver sjrieve in ’t Limburgs (SesieL) Deel 13

Besjerm oos oetsjterve

’t Mót neet gekker waere. Höbbe mich ein dieke hampel taalorganisaties ein Hoes veur ’t Limburgs opgerich, mót ich SesieL gaon vraoge waat in die sónjese bóks zoot. Ze begós sebiet te zinge: waat zól d’r in det fleske zitte…

… en doe leet ze mich raoje waat de euvereinkóms is tösse ein fles en ein bóks. Ich zag det ich die vraog zelf bedach hauw, en begós euver de hals van ein bóks, wo de Hollenjers nieks van sjnappe, en noe mót ich veur sjtraof eine column make euver sjrikdraod in Helje, dae de paettante van mien vrouw aanzat toet ei prachtig waord veur wo de geweun vastelaovesmiense nieks mit vandoon wille höbbe. In de volgende nómmer…

Geit ’t uch ouch tirvele? Mesjiens good efkes nuuj Veldgewassers te vertelle det SesieL gein nutte vrouw is die door ’t Hoes sjpook.  SesieL sjteit veur Sjrieve euver sjrieve in en euver ’t Limburgs.
Sjrieve. SesieL – höb ich dökker gesjreve – haet neet väöl mit sjpelling. En det geit grote probleme oplevere. Ich höb geheurd det d’r mesjiens waal veertig cursusse sjpelle zien. In Mesjtreech sjteit langs de belangriekste invalswaeg reklaam veur de cursus Speulentere spelle.

Ich weit neet wie waat woveur. ’t Grote Doel van ’t Hoes is det ’t Limburgs dezelfde sjtaotes krieg es ’t Fries, waat väöl geldj sjient op te levere, wodoor ’t Limburgs maximaal besjermp kan waere – höb ich gelaeze. Dao begriep ich nieks van. Woveur mót ’t Limburgs besjermp waere? In gevaor, vónj prof. Cornips vief jaor geleje. Code Rood oetgerope. Waat gevaor? Oetsjterve? Vervolging?

Ich wach nag op antjwaord oet ’t Hoes. De nuje SesieL guf dan ouch antjwaordj euver die böks en nag väöl mier. Kump volgende maondj.

Wim Kuipers

Deze tekst is niet in het Nederlands vertaald omdat een vertaling afbreuk zou doen aan de teneur ervan.