Veldgewas: de stem bij het gedicht (Juni 2026)
Sommege diechters sjikke neet allein de tekste vaan hun gediech nao Veldgewas meh spreke die ouch in, zoetot die ouch te beluustere zien. En dat lievert dèks bezunder en intiem luustermominte op. In deze nómmer vaan Veldgewas leus Godelieve van Gemen häör gediech “Libellula Fabula” veur. Es geer op d’n audioknóp hei-oonder duit kint geer dat beluustere en d’n teks dee droonder steit mètleze.
Libellula Fabula
*Bön neêt sjoew, do greuzelke!
Weej zulle eur vinge
In eine langhäörige mankel
mit pluze rendierhaor
oppe kop ein kruûnke
mit goudgaele blumbkes
mit Hazesjtertjesgraas.
Noêts mier hoofse daonao nag
vur get sjoew te zien.
Wienier det zien zal, weite de rotse,
opgeblaoze in segmente
diej ós waeg van zangk
deje begaonber make.
De segmente zulle ónversjtaonber
in gebraoke sjpraok bliêve krake
Ens zals do doon zitte op eine rots en
versjtaon de sjpraok van de sjtein.
Dien erm zalle vleugele zien en
do geis eine nieje waereld zeên.
Zoe sjprook de vader toet zien kingk
**
“Libellula Fabula”
de Wiefkeslibel, wies ós de waeg
zeej geit op sjtökskes zitte wachte
wies weej d’r zien.
Ze zal vur ós oêt wir vlege
allein zeej wet de waeg.
Do bös zoe sjoew, ónneuzel Zjwanehelske
dink neêt aan ’t knallend Dynamiet
det op ken blaoze rotse van Graniet
haoj in ‘t bluûske dien Mieske werm
sjmiespel zaoch get in zien uurkes.
Laot ós gaon Braomele aete
vur det we zien beej de Sjpróng
de Sjpróng van Zlata Baba,
de Golde Moder van al ’t laeve
det bleujt en det sjtörf
in drap of in törf
***
Dao kómme kleng mit de wingk
van wiejer weg gevlaoge
oêt ein fieës mesjien
mit oêt de Hel gekraope gejoenk
getetter doeng doeng doeng doeng
in ’t wille weg verdauvend
zumpend kakend mekend
’t kump van minse gunder dao
van diej dao guns dao
dao is ’t aan de geng
in de Roerdal-Sjlenk, det klink.
Jao dao dao danse zeej
danse danse die gen danse zien.
Ózelig sjaemel gekrónkel gebónk
van minse diej pien wölle verdauve
mit zoêpe vraete catha kauwe
lienkes sjnoêve poeiers numme
oêt plastieke baekers drinke
drenskes drinke allerleise
drenkskes drinke zich versjlikke
Um same doên taengenein geduujd
same te kunne doôn offant offant
offant ze kammeräöj zien offant
diej neêt weite wiezoê daen toêmel
waoveur det laege geveul
Alcoholisch zien ze verwek
alcoholisch ein kiendje gewaore
mit sjaaj al gebaore gebaore
Macaber klinke kótsende kleng
oêt kaele mit nötte tung
kómme fatale wäörd van niêd
van hebzuch aafguns en van haat
geweld wuurd aangesjpanne
ónger gelach waere duvele gebaore.
Wae dao in dae waereld van
offant offant allemaol kammeräöj
ein waerwaord guuf, dae zal
ónger graof gelach waere gesjlach.
de Kammeräöj zien einen Draak
mit doêzende veursjpiejende köp.
****
Zjwanehelske velt in sjlaop
beej ’t roêze van de Sjpróng
’t druimp van einen Ingel
mit geitehaor en hazesjtertjes
’t Miemke sjpint.
dao zinge mösse en moetse.
De Libellula Fabula.
wao is diej gebleve?
Och kiêk, dao vluug ze
Gedich van Godelieve van Gemen
Baolder juni 2026