Veldgewas: De stem bij het gedicht of verhaal (mei 2025)

Telkens meer schrijvers zijn zo vriendelijk hun gedicht of verhaal niet enkel naar Veldgewas te sturen maar de tekst ook nog voor te lezen en daar een audio-opname van te maken. Dat levert vaak persoonlijke, aangrijpende of vrolijke luistermomenten op. Voor de Meinummer van Veldgewas hebben we 4 oopnames ontvangen:  van Antoon Brouns uit Klimmen met een verhaall over Flessepost, van Godelieve van Gemen uit Baarlo met een gedicht over een Anzichtkaart, van Felix Bergers uit As (B), actionpoetry over de ridders van de nieuwe tijd en uit Maastricht het  Verhaal van Tessa en Tum doo0r Yuri Michielsen en Judith Wolfs. U kunt de geluidsopnames hier beluisteren en de tekst die eronder staat meelezen.

Antoon Brouns oet Klumme: Flessjepos

Flessjepos

Ènne opa leep mit zienne kleinzoeën Pierre va 10 jaor jüs boete Mesjtreech langs de Maas. Taege d’r kant aa zoge ze ’n flesj die dao i de golve op en neer góng. ‘Ze góssje ouch maer van al in ’t water,’ zag d’r opa, meh doew zoog hae datter get wits in de flesj zoot.
‘Kinse die flesj aeve pakke, Pierre,’ vroog hae aa zienne kleinzoeën. ‘Bisse waal vuuerzichtig?’
Wie d’r Pierre de flesj haw gepak, zoge ze datter e breefke i-zoot. Wat zow dao-i sjtao? Messjie is ’t waal ’n sjatkaart.
‘D’r is maer ein meneer óm dat oet te vinge en dat is ’t breefke droet te haole,’ zag d’r opa.
Hae drieënde d’r dop va de flesj, meh aj, dao zoot ènne körk i, en wense mit dienne kleinzoeën geis wandele höbse gemèntelich geine körketrèkker bie dich.
‘Da numme v’r de flesj mit heivisj en make ‘m dao aope,’ zag d’r opa.
D’r Pierre kós neet wachte en wool noe metein op heim aa. Hae waor behuuerlich nüjsjieërig nao wat er in dae breef sjtung. En eigelich waor zienne opa dat ouch.
De flesj woeërt in ’n plestiekke tuut gedao, die d’r opa bie zich haw en ze leepe heivisj.

Koum binne leep d’r Pierre opgereeg nao de oma. ‘Oma, kiek ins wat v’r vónge höbbe.’
‘Wat mósse noe mit ’n nötte flesj,’ zag de oma. ‘Dienne opa rap ouch al op.’
‘Nae, oma, dit is neet ’n gewone flesj,’ zag d’r Pierre, ‘die kump oet de Maas en d’r zit e breefke i. D’r opa geit dat droet haole.’
Óngertössje haw d’r opa d’r körketrèkker gepak en de sjroef i d’r körk gedrieënd. Aeve later ènne “plop” en d’r körk waor droet. Mit ’n pinset woeërt ’t breefke oet de flesj gehaold.

D’r opa vouwde ’t papierke aope.
‘Wat sjteit drop?’ vroog d’r Pierre, en wie zienne opa neet flot genóg d’r mónd aope deeg, ‘Kóm, opa, zègk ’t mich.’
’t Is in ’t Frans,‘ zag d’r opa.
’Meh doe kins toch Frans. Doe höbs mich toezjoer gezag dasse vreuger zoeëväöl tale moos lieëre op de sjoeël,’ zag d’r Pierre.

D’r opa besjlaot zienne kleinzoeën neet langer te laote sjpartele en zag dat ’t breefke waor  gesjrieëve dörg e Frans maedje va 9 jaor, dat Amelie heisj. ’t Woeënt i Givet, vlakbie de Belgsje grens, en geit dèkser mit zienne grand-père wandele langs de Maas. ’t Haw in e book gelaeze uuever flessjepos en besjlaot ouch ins e breefke te sjrieve, in ’n flesj te sjtoppe en in de Maas te goessje.
Va zienne opa kreeg ‘t ’n laeg flesj die hieël good woeërt zuuver gemak en va binne gedruueg. ’t Breefke woeërt i de flesj gedao en mit e klein mesjien woeërt ènne körk i d’r haws gedrieënd. Daonao nog ènne dop drop.
Vanaaf ’n brögk uvver de Maas leet ’t de flesj in ’t water valle, in ’t midde va de reveer. Zoeë zow ze neet metein nao d’r kant drieve, meh mit d’r sjtruim waere mitgenómme. In d’r breef vreug ’t Amelie of daeginnige dae de flesj vung, häöm wilt laote weite woeë de flesj vónge waor. ’t E-mail adres van ’t Amelie sjting op ‘t breefke.‘
‘Wat jaomer, gein sjatkaart,’ zag d’r Pierre. ‘Wat dónt v’r noe, opa?’
‘Sumpel’, zag dae, doe sjriefs ènne e-mail nao dat Amelie.’
‘Meh opa, ich kin dat toch neet, in ’t Frans. En daobie, ’t is e maedje.’
‘Doe hoofs ouch gei Frans te kinne. Ich zèt ‘t waal vuuuer dich óm. En wat dat twieëde betruf, wat mak ’t oet dat ’t e maedje is. Doe vungs ’t toch ouch leuk wense e berich trük zows kriege?’
En zoeë gebuuerde ‘t. Aan ’t begin van d’r e-mail lag d’r opa oet dat d’r Pierre d‘r breef haw gesjrieëve en hae ‘m allein maer haw ómgezat nao ’t Frans.’t Amelie waor excité wie ’t d’r e-mail va d’r Pierre kreeg. Jaore gónge vuuerbie. Geraegeld sjreve de kinger zich. Nao e jaor of vief hófde d’r opa nimme óm te zètte want d’r Pierre kós noe zelf in ’t Frans sjrieve.
Es vazelf verangerde de teks va de e-mails. Bliekbaar hawwe nao ènne toer d’r Pierre en ’t Amelie aafgekald dat ’t nao al die jaore tied woeërt dat ze zich ins in ’t ech zoge. Ze hawwe waal al fotoos nao eij gesjik, meh noe meuste ze zich ins richtig i de ouge kieke. Ze kalde aaf i Huy. D’r Pierre vróg aa d’r opa óm häöm te bringe.
Wie ze zich tróffe, blieëk ’t Amelie ouch dörg zienne opa gebrach, en ouch kaom oet dat dae opa van oeërsjpróng oet Mesjtreech kaom. Hae waor ènne Mesjtreechtenaer! De lètste twieë maond haw hae geprobeerd ’t Amelie get Mesjtreechs te lieëre. De twieë opaas gónge örges appaart zitte zoeëdat d’r Pierre en ’t Amelie óngesjtuuerd mit-eij kóste kalle. Ze blieëke ’t al flot good mit-eij te kinne vinge.
Óm e langk verhaol neet nog langer te make, dae kleinzoeën va doew is noe d’r pap van e petite Amelie en ènne kleine Sjeng. Zoeë blieëk dat breefke i die flesj oetentelich toch ’n sjatkaart te zieë!

Godelieve van Gemen oet Baolder: De Anzichtkaart

De Anzichkaart
1965

ein kaart en eine poszegel mit koe
naat gelek, daonao geplek
op ein ansichkaart
gesjtempeld in Eidfjord
wao Tinus waar
in negetien viêf en sestig

gegaon waar hae
vur eine trektoch mit zich allein
um te gaon versjtaon
waem waar hae doe
waem waar hae aan ‘t waere
waoveur waar hae ingetraoje

einen hóngk kwaam aan zien ziej
en bleef offant ‘t zich zoeë huurde

de Hardangervidda lok
mit wille euvermoôd däölt de mins
den bril verlaore doe hae oêtlitsde

raengelsjniee velt iêzig
in de reêt tösse twieë rotse
zak Tinus weg

zeve tieën haet den hóngk
aan alle veêr zien puût
mit mach trok hae um los
de mins mit bein die bloojde

vergaeve van piên
kaakde de mins wiej wild

en waar in ein insigge sekond
det verke van doe
aan eine gebónge poeët
vrieëd den doeëd in gerete
ut bloôd woord opgevange

gebaore oêt noêd
zuût baove zich de mins
wiej sjterre uigske niêpe en
zuût hae de volle maon die löp

Tinus wet noow wiej leêfde laef
den hóngk ligk op um waerrem
de sjterre sjlekke, ein zón geit op

hae dink: dage…raod en huurt
kleng van braekend kristal
klinke oêt de reêt wao ’t duûjt

hae krats zich vas aan eine kei

de Ingel der vergaetelheid óntfermp zich
euver de sjtervende
dae óngerwaenges waar nao Blå-is
vurdet de mögge zoeje kómme

de koe op de postzegel
is aangekómme mit de anzichkaart

Beste Broer,

Alles okay. Hiel sjtil sjtil is ‘t heej. Ónwerkelik landsjap.
Miene lichgewich rögkzak haet noow 2 kilo hóngsvoor.
Ein saort Keeshónk löp achter mich aan.
Hae is klein en sjterk.
Haoj dich. Tinus en den hóngk. Pax Christi.

Godelieve van Gemen
Baolder, mei ‘25

Felix Bergers oet As (B): De Ridders van de nówwen ti-jd

De Ridders van de nówwen ti-jd

 CRISIS
Bès verzore en minse verbittere
CRISIS
Bómme barste en harte braeke
CRISIS
Verhitte kèp en ónnerkeelde harte
CRISIS
Eigskes verkleine en rimpsels vergroeëte

De vrindsjap weert mager
De sjoeënheid weert vager
Ous leedsjes stake
Ous droume krake

CRIISIIS

Lówster
Hier de paerd hinnen hoofslaag
Hier de ridders hin wild gejaag
Ze beginne ‘ne sjoeëne stri-jd
De ridders van de nówwen ti-jd

Eine bleest op d’n hoern e leed van heropstanding
‘Nen annere deit z’n bóks oeëpe en pist èn de snieë
“VER”
Z’ne pis is op…
‘Nen annere ridder deit z’n bóks oeëpe en lieëtert èn de snieë
“ÓWT”
“VERÓWT!!!”

De ridders van de nówwen ti-jd goeën hel van start
Wi-jjer en wi-jjer recht nao ous hart
VAE  ZEEN  DE  RIDDERS  VAN  DE  NÓWWEN  TI-JD!
Vae bloeëzen e stri-jdleed!
Vae spojen ous nao ‘ne nówwe waereld!

Ous gepi-jnigde gezichte zille nao ein glimlache
Ous bebloojde han zille nao ein lange
Ous gekloeëve lippe zille deindanner beaojeme
Ous verannewaerde li-jve zille deindanner ómerme

Al li-jke v’r op kadavers èn e slachthóws
Al li-jke v’r op gebroeëke reet èn de wènter
Al li-jke v’r op ’n doeëj mès èn de snieë
Ous harte sloeën
Ous harte sloeën
Sloeën
Sloeën vier de nówwen ti-jd
Kieken ówt nao ’n anner meneer van laeve
’n nów meneer van laeve
’n anner meneer van laeve
’n nów meneer van laeve

Felix Bergers

Judith Wolfs en Yuri Michielsen oet Mestreech: ’t Verhaol vaan Tessa en Tum

’t Verhaol vaan Tessa en Tum

Verhaol: Judith Wolfs en Yuri Michielsen
Luusterbook: Goal043
Stum: Bionda Eggen

Tessa hèlt vaan de carneval. Zie heet evels geine sjattepie. Daorum zit ze dèks op Tinder. Want zie wèlt neet allein e pèlske pakke. Zie zeukde ‘nen appetieteleke maan.

Inins raakde ze mèt eine aon de praot. En ze hadde ederen daag kontak. Heer waor ‘ne veurnaome jong oet Wiek. De appkes vloge euver de Aw Brögk en trök. Ze perbeerde oonderein Mestreechs te sjrieve.

Dat lökde neet metein foutloes. Meh heer waor hiel gedöldeg mèt häör. Tum daogde häör oet Speulentere Spelle te speule. Zoe lierde zie Mestreechs sjrieve. Zie böttelde ziech um de hoegste score.

Meh Tessa wouw mie. Wie kraog ze häöm achter ’t sjermke oet? Zie zouw z’ch zoe gere eine mèt ‘m pitse. Intösse waor ’t euver drei daog vastelaovend. Zie vroog of zie ziech kóste treffe.

Örges wouw zie hiel gere. Toch voonte zie ’t alletwie hendeg spanneteg. Ze hadde vaanein nog gei fotoke gezeen. Tessa kós allein mer denao raoje wie heer oetzaog. Tum stèlde veur e maske te drage.

Sjiek en sjoen verkleid dörfde zie wel. Mèt e maske op bij de Stumpkeszitting. Want dao is altied väöl volk. Mèt al die drökde voonte ze ziech neet. En Tum had zie mobielke neet in z’n broketes.

Tessa góng höl euver tröl trök nao hoes. Zie waor gans verpópzak. Had ‘r häör laote zitte? Later deen aovend kraog zie e beriechske. Heer booj zien veroontsjöldeginge aon.

Toen kaom zie drachter. Tum waor gaaroet neet vaan Mestreech. Meh woende hei al jaorelaank. Tum had zelf Mestreechs liere sjrieve. Daoveur gebruukde heer d’n app.

Tessa voont dat zjeniaol. Zie voont ‘m stiekem toch ‘ne sjattepie. Hun benkelek momint kaom daan toch. Ze troffe ziech oonder ’t oug vaan ’t Mooswief. En sjreve ziech nog lang en gelökkeg in ’t Mestreechs.

 

’t Verhaol vaan Tessa en Tum tröfste aon in d’n app Speulentere Spelle. De Limbörgse Academie en Veldeke Krink Mestreech höbbe de han ineingeslage um lui die ’t Mestreechs kinne spreke of demèt bekind zien te helpe um ’t Mestreechs ouch te liere sjrieve. En daoveur höbbe veer us get oetgedach! Speul en lier Mestreechs sjrieve. Speulentere dus, mèt väöl versjèllende späölselkes en get oetlègk, liere veer diech ’t sjrieve in dien moojertaol aon. Euvereges, este ’t Mestreechs liers sjrieve, lierste ouch lètterteikes veur väöl aander dialekte vaan ’t Limburgs.

Tessa en Tum höbbe dat ouch gedoon en ziech mètein gebötteld via Speulentere Spelle. Op ’t ind vaan d’n app in niveau 6 kumste hun tege. Niveau 6 bevat de Groete Indtoets en dao-in koume alle illeminte trök dieste in de veuregende vief niveaus vaan Speulentere höbs aongelierd. Nuisjiereg gewore? In de App en Play Stores kinste Speulentere downloade. En op speulenterespelle.nl vinste mie euver d’n app. Veur noe geneet, lezentere of luusterentere, vaan ’t späölse verhaol vaan Tessa en Tum.