Veldgewas Moenik: Toos Schoenmakers – Visschers

Voor meer informatie over Toos Schoenmakers – Visschers klik hier.

corona 3

kleinkinger knuffele
wat mis ich ’t ocherm
ofwen ze ummer korter waere
mien erm

**

dök zjwaor te vertaere
’t is ofwen mien erm
ummer korter waere

Augustus 2020

augustus

sjtraolt in häör
soberheid,
oet ’t veldj
neet weg te dinke.
degelik in ’t goudgael kleid
boerewormkroed
augustusbroed.
gezeefde zón of raenge,
’t is wachte
op de kroedwösjzaenge.

Augustus 2020

juli

dröppeldans
op hostablaad
lach duvels
óm mien sjlakkehaat

Juli 2020

juli  (2020)

det aangenaam
zöchske windj,
’t badderend
sjpelend kindj,
de zeukende vlinder,
van alles te mótte
get minder,
blote veut
op verkeulend graas,
en zomer inne vaas.

Juli 2020

maerel wilt
van corona neet heure,
leet zich neet sjteure,
sjpegelt zich
in blinkende roet,
zingk zien leed
daag-in
aovend-oet.

Juli 2020

zomer in ’t zuje

wen de morge
dörsjtig wakker waert
zich zón-sjlurpend versjlik:

zomer in ’t zuje

en ’t limburgs landjsjap
goudgael bane krieg
zomervane inne werme windj:

zomer in ’t zuje

wen zón en sjeem
in haol waeg
zich winsjele:

zomer in ’t zuje

en de nach zich buig
euvere aovend
morge neet zoooo werm belaovend:

zomer in ’t zuje

Juni 2020

zomer 2020

geur van opkómmende dille
bleujende klaproze
goudsblome
geur van kamille
heerlik blumke
eerlik blumke
geur van zón en veldj
van zejje en paote
en sjtilkes greuje laote
van rozekransbone
en bleujende vlier
zomer óm in te wone
haof óm in te sjoele
wied weg van mondjkepkes-bla-bla
wied weg van corona.

Juni 2020

Optoch

’t waar fantazere
ammezere,
wèrke
plekke, lekke,
knippe, nejje,
sjoere, vèrve,
lache, sjatere,
drinke
klinke,
kaw lieje,
zich werme,
gezelligheid,
same.
wachte mit prónkende vaere
waat waer zal ’t waere?
raenge? sjtorm?
optoch aafgelasj?
oetgesjtèld?

effe vèlt alles in ’t water,
sónger optoch
ouch grote gater.

Februari 2020

vastelaovesvlagge flakere
windj sjpilt door vaere
door boa’s
’t wejt – ’t vrink,
’t sjoevert, ‘t sjprink,
’t is loupe-trèkke-duje,
träöte-kruje
danse-sjanse,
muziek davert
vanne wages,
aan sjpas
gein klages,
optochsjpektakel
allerhandj,
erns allein
veur kouw kiekers ane kantj.

Februari 2020

inne sjtil sjtilte
sjreef de werreld
in alle klasse
óm kómpasse

*

maon ane hemel
en sjtergeflónker
sjtil ’t dónker
in mien dinke
herders winke
óngerwaeg
van sjaop nao sjtal
vertroewe
en haop baovenal

december 2019

ein purpere zee
van bleujende hei
gelök en weemood allebei

**

septemberzón
op lèste roos
ougetroos

September 2019

weer eine tropische
zomerdaag
heit en dreug
de windj zelfs
werm en meug
aan alles ein teväöl
hèts lik wie verduseld
in veldj en voor
sjtrak kin ich allein nag
es zaatvraeter de zomer door.

September 2019

vrieheid

dök is vrieheid
neet meer
es ’n mot
die gevange
in gordiene
häöre vluchwaeg vingk
vrieheid verbingk

September 2019


zomer in ’t zuje II

wen de morge
dörsjtig wakker waert
zich zón-sjlurpend versjlik:

zomer in ’t zuje

en ’t limburgs landjsjap
goud-gael bane krieg
zomervane inne werme windj:

zomer in ’t zuje

wen zón en sjeem
zich winsjelt
in haol waeg:

zomer in ’t zuje

en de nach zich buig
euvere aovend
morge neet zoooo werm belaovend:

zomer in ’t zuje

Augustus 2019

vastelaoves-zaenge

kleure vlege van ’t palet,
dörf sjpringk oet ’t daags korsjet,
wäörd en wies waere ein,
ritme kruup in erm en bein,
blik neet op ’t sjerm
mer erm-in-erm,
mars, polenaese of wals,
vruijd vluug dich ómme hals,
’t moog doere-doere-doere
alle vastelaoves-oere,

vónke vruijd en sjpetters sjpas
sjoevere in werme vastelaovesjas.

Februari 2019

sjoeverend
in werme wintjerjas,
körsjkes brood
en greumele inne voes
veur ’t vogelhoes,
is vruije
op puur mösje-sjpas.

**

sjneemenkes
sjneevruiwkes
moere- naeskes
glinstrende uigskes
sjaatrende lach
van ’t winsjelend kindj
eersteklas
wintjersjpas

wintjerleid
wen de pratsj toesjleit
wintjers geknoter
euver sjliek en toter

Januari 2019

wintjersgewies

traog trèk
de daag zich
in ’t wintjerbildj
sjnee en ies
wit en gries
zjwiegenderwies

vandaag is vandaag
nieks bringk de wintjer
vanne wies
mer de sjaatser drömp
daag-in daag-oet
van blome oppe roet
en flitsend ies

Januari 2019

riem

wintjer sjrief de kaw
neet in ’t klad
mer geliek in ’t net,
sjoonsjrif neump me det,
ich raak d’r neet
op oetgekeke…

en wat is gebleke,
hoe ‘t ‘m éch in zit?

de meister keek
euvere sjouwer mit.

Januari 2019

henkie

wat kwaam d’r gaer
klein kaerelke
van amper veir

heim in ein tehoes
zo klein al bekind
mit gebroek vanne voes

wat kwaam d’r gaer
klein kaerelke
van amper veir

gezónj sjtröbbersjtreek
hej d’r veil
hie waar leefde zien deil

’t mót neet ophawte
zag d’r keer op keer
dit sjmakde dudelik nao meer

veer hejje ‘m mer te leen
ziene druim:
eine van ós te moge zeen

hae kwaam zo gaer
klein kaerelke
van amper veir

November 2018

zomer in ’t zuje
(geweun hie bie ós)

nieks hóf
en nieks mót
blote veut in ’t graas
zo mer zomer
wie ’t vreuger waas

zomer in ’t zuje

nieks mót
en nieks hóf
móddelig werm
ocherm
alles taam
kleine werreld laam

zomer in ’t zuje

ich geneet
en ich baal
want ich wil
eigelik waal…
effe danse
door get malse
raengebuje

zomer in ’t zuje

Juli 2018

wen ich aan limburg dink

vreug morges,
vogelgezjwets.
werm middige
binne en boete,
sjallende lach.
sjtil aovende,
deur bao neet
kinne sjloete.

raam wiedaop,
klank van aovesklok
wo eeuwe in sjoele,
aovesroew,
noe waert vreuger,
vreuger waert noe.

roesje vanne windj
langs de leigraaf,
zachte klach.
zóngesjitter
op sjtroum vanne roer,
golve wie mit goud belag.

wie geveul
te besjrieve?
sjtil sjtilte,
ein zjwiegende daeke
wie van sjnee.

gewortelde wäörd
preuve de sjmaak
wat zeut zich winsjelt
inne móndj,
sjmaak vanne limburgse gróndj,
sjmaak vanne zachte G.

November 2017

paosjwaek

’t wilt weer
veurjaor waere
nuuj greun
lich wie vogelvaere

inne aovend
klink ’t klage
’t zjwaor te drage
de sjnik van ’t laeve
vanne dood
wir setzen uns
mit tränen nieder

vingk ’t lich zich
inne nuje daag
is dao fanfareklank
communekindj
paosjklokke
gelouf en haop

vruijd
lich wie vogelvaere
leid zjwaor te vertaere
ummer en ummer
wilt ’t weer veurjaor waere

toch? god?

April 2017

meert

nag effe
wachte en sjmachte
nao veurjaorsgreun
dit zómpige
zoow aant
zumpe kinne bringe

toch zeen ze d’r
de knuup
mit ouge op sjtilkes
sjpäör ich ze
weg van gevräör lónk
de veurjaorsvónk

crocusse nag
op sjpillebein in ’t graas
sjtrieke sjtrak
wiedoet de rökskes
bringe weer ’t werme
’t paosjerberme

Maart 2017

landjsjap in nevele
kaw en natigheid
euver gróndj en sjtevele
kleure toet fluustre te kriege
novembermorge wit te zjwiege

December 2016

zjwart de buim
kaal de krune
vaal leuterlóch
veur de veut
nate blaar
naojaorsbóch
sjtil de veugel
sjtraoterm waer

al die branjende lichskes
wat zeen ich ze gaer

December 2016

vaal lóch loert sjael
in sjpegelend water
kindj sjaterend tratsj
in naojaorspratsj
sjoon ’t moment
wied weg ‘t later

December 2016

te groot, te väöl, te drök,
agressief, versjlaaf,
wo ónger gebök?
de werreld sjprok en waan gewaore
traone óm kinger die óntsjpaore

December 2016

’t greun
neet meer greuner kin
de sering neet vóller
’t vergeetmenietje neet blauwer
de klaproos neet deper rood
’t vogelèsjke neet zachter
de kadzjel neet kadzjeliger
’t wónjer vanne natuur
blief óneuvertróffe bleuje

’t werreldnuujts
de ónrös euver ’t waalbevinge
vanne luuj
beangstigend blief greuje

Mei 2016

sjlak

ich höb aan alle weuningadvieze lak
ich bön miene eige makeleer
zaet de sjlak

Mei 2016


sjlakke

ónzichbaar op paad
es hóngerig leger
lieke sjloom
zelfs integer

van al dae hónger aevel
es resultaat:
laoker – zjwarte gater
en kaal
zo ermzelig kaal effe later

oos hosta’s lieje al jaore

toch haet emes ze oots verzilverd
die sjlakke-sjpaore

Mei 2016

en euver de dörpel sjtappe twee veutsjes
oma! oma! ich höb blome veur dich!
ware uigskes oots zó sjoklaat-broen?
ich buig mich veureuver
veul mien ouge glanze
en friemel de blome
tösje zien vingerkes oet, heel veurzichtig.
’t klènste eierdöpke nag te groot
same bewónjere v’r “’t boeket”
en gaeve ’t ein plaetske
midde-n-oppe grote keuketaofel

mien keuke dans!

April 2016

raenge roefelt, roesj,
zawwelt, zeivert, ziep.
wo sjoele de veugel?
wo sjoel ich?
wo sjoelt det
zóndoorsjtoofde, zeumerend
zomergedich in mich?

April 2016

Wer hat dich so geschlagen *)

muziek gekaoze veur
zo mer eine meertse morge
det teks dan zo deep aan kump!

brussel
aansjlaag nao aansjlaag
waem sjleit waem

ónsjöljige van veiligheid
zelfs van ’t laeve berouf

bienao paosje

weer eine aansjlaag
op mien gelouf.

*) Johannes Passion

Maart 2016

jannewarie 2016

awd op nuuj
knalt en sjpiejt vuur
alle Menschen werden Brüder
äöpent bie ’t nuuj de duur

sjtökskes droum
oetgesjtruijd
hampel-vuur-hampel

wie dök al
vuur de veut vertrampeld

***

jannewarie
de daag langer
de nachte korter
en weer verlang ich
nao de mei van Gorter

Januari 2016

os en aezel, twee
ónneuzel dere waere
in ere hersjtèld

**

väöl ónbewuste
akrobate sjtaon knap sjterk
op waersje sjaatse

December 2015

augustus

sjtil zomerrös

heur vanne vogel
vleugele vrieve
inne vluch

sjtille aovend
zomerzuch

blief nag effe talme
kalme aovendwindj

nachrös vleit zich neer
wie vlumme
op wang
van sjlaopend kindj

Augustus 2015

mei

inne sjoot vanne aovend
röste veldj-zomergeure
vlier – kamille

’t is puur
ein euvergaeve aan dees rös
effe neet méér te wunsje
neet méér te wille

Mei 2015

oktober

wintjer sjliep zien zeis
sjtreek veur sjtreek
in kadans

halt ze dalik ónbesuis
euver naojaors-rögkesjtrank

kleure sónger kans
op euverlaeve

wete nag effe
ouchverblinjende
riekdóm te gaeve

Oktober 2014

september

de wierook vanne zónjigmorge
hingk euver ’t paad
veur mien veut
kleurriek naojaorsblaad
en kersjtaangele
glanzend gelak
wie juwele verpak

ich bewónjer
emotioneel

nag altied gein zjweel
op mien zeel

September 2014

haofsjpinsel

juni

hèts wankelt euver aope veldj
sjmoort alle geluide

leeuwerik fluustert
alles wach op verkeuling vanne aovend

klaproos – zomervaan van ’t roodste rood –
telt häör frunsels
’t zeen d’r väöl

kaorebloom leunt – sjteunt
kemille en goudsblome blieve sjtraole
sjlurpe mit aope hert vólop zón

peune de middig
veldjgewas leet zich neet óngerkriege

lupine doon dinke aan vreuger
ouch de geur vanne siererwt

laot ein inkel netel mer sjtaon
veur de vlinders
det fladdert wie aangesjaote
baove zomerbleuj

zittend
doon bie de gróndj
is ’t good zaengeninge tèlle

Juni 2014

veurjaor rèk
royaal nuuj greun
mit aope henj

bleuj es paot- en zejloon

maerel
bringk zien aovendleed
op melancholische toon

sjeem vanne daorekroon

April 2014

triolet

is ’t de akelei, is ’t de appelbleuj
of is ’t de ziejezachte aovesgleuj,
wat bringk weemood toet greuj?
is ’t de akelei, is ’t de appelbleuj
ouge drinke ’t bildj
luppe preuve de veurjaorslóch zo mildj,
is ’t de akelei, is ’t de appelbleuj
of is ’t de ziejezachte aovesgleuj?

April 2014

kleine krak

al verdrink
de kleine krak
bao in zien
kakelbóntj
vastelaovespak

uigskes sjtraole
en bepaole
det de welt
éine grote polenaise is
van geure
muziek en kleure
zinge – lache
danse – sjanse

same

ich mót beame

dit  bildj
óm in te lieste
óm noots te vergaete
me zoow
de kleine krak
in vastelaovespak
regelrech
op kinne vraete

Maart 2014

veldjlewerik

dao is d’r weer
zien heerlik gekwinkeleer
zingk de weemood
vanne wintjer weg

zien leed
wat veurjaor
én zomer
zo deep
in zich dreeg

zingend
nao grote heugte
en zjwiegend
weer ómleeg

in ziene zangk
geure van gelp graas
enne gleuj van aopeveldjdrek
inne middigzón.

de sjtilte
vanne zomeraovend

’t geveul
altied kindj
te zeen gebleve
in ein welt
zo väölbelaovend

Februari 2014

triolet

ich höb de wintjer geraoke
aan bloom en blaad en ane gróndj
de wintjer is aangebraoke
ich höb de wintjer geraoke
bön in sjaal en jas gedaoke
blaos sjmorges wölkskes oete móndj
ich höb de wintjer geraoke
aan bloom en blaad en ane gróndj

Januari 2014

de natuur
sjteit gedoek
ónger ein lóch
wie leuter zo vaal

buim kejjelik kaal
wachte gelaote

wat geit jannewari doon

brak water
sjpegelt in sjnippers
de sjuunse lach
van de vreuge vastelaoveskloon

mit ein hampel confetti
vanoet de tesj vanne jas

plamuurt hae ziene paad
vól kleur en vruid ane
kómmende sjpas

Januari 2014

kerswunsj 2013

december

zich te kinne werme
aan ’t rood
van ’t glaas-in-lood

te sjtiepe ane sjtilte
van ’t awd verhaol

same oppe kneen
de grote werreld
in ‘t klein te zeen

in ónbegrens vertroewe
mit blieve boewe

in depe kómpasse klumme
ós ’t zinge
van stille nacht
en de herderkes
neet aaf laote numme.

December 2013

klezmer

mitsjleipende klanke
gejubel en gekreun
in dans
in trance
aope handj
gebalde voes
wo dood
en laeve in hoes

***

meziek

de sjlaagwèrker
roefelt, sjleit,
leet lóch
laeve,
viemp ’t vel
hel,
mer ouch
mit sjtil gefluuster,
brik ’t duuster
in sjplintjers lich,
wit zelfs te zinge
en oorverdouvende sjtilte
te bringe.

December 2013

naojaorsbiljer

kaw haet zich oetgeneud
naojaor mót pot vertaere
aovend dreeg
de glans van pauwevaere

gewild of neet gewild
’t zal weer wintjer waere

***

buim oetgeklèd
op ei vlangerökske nao

in nevel gevange

sjiljersjtök in gebed

December 2013

kroednagel

(syringa)

wie eine feesdaag
blie en mónjig
aomp ilk zuchske windj
’t pure van processezónjig

Mei 2013

raenge-raenge-raenge
ein gansen-daag-doorbuuj
kindj plaart middedoor puil water
en drink sjaterend
de dröppels van mien parepluuj

Mei 2013

mei

fluitekruid is oetgebraoke
kruujt door oos limburgs landj
haet de kómmende zomer al geraoke
siert butelend, kutelend
wal- en waegkantj
sjtraolt inne zón
en weeg oppe windj
wie ein oetgelaote kindj

mak mich zo blie
oos veurjaors-sjoetsmerie

Mei 2013

lilbósj

de hel blauw lóch
plooit mit zorg
häör kleid
door de nag kale boum

veugel twee aan twee
vleie zich neer inne sjoot
sjlurpe mit aope bek
zón nao binne

en verrasse de zónjig
naeve ’t kleppe
van ’t kloosterklökske
mit ein twelfoerskónzaer

April 2013

crocus

bie ’t zeen van
’t eerste truusjke
bleujende crocusse
veul ich in mien ouge
wie van ’t kindj
de verrökde blik
op de gewónne sjat
in ’t költje-kuulke

Maart 2013

langs ’t lèste
oetgeruffeld
sjtökske wintjer
sjniedert ’t veurjaor
fienvingerig
hert vól gelök
aan ’t ein
nao ’t anger
kleurriek
paosj-prónksjtök

Maart 2013

’t lèste sjiefke  wintjer
sart de maerel
blinkend zjwart
op reis nao
zien dageliks brood

vluug mit ‘ne sjlaag
taenge de roet
lik de kop
veurgood inne sjoot?

nae,
maerel sjleit
de wintjer dood.

Maart 2013

kroenekrane

heur mich ins effe aan
zaet vól zorg de kroenekraan
wat waere v’r toch geplaog
noe weer det gaat inne lóch
die ozonlaog
’t geef ein bang geveul
óm ’t hert waert ’t mich al keul
jao ich krieg erm zin

vleeg ich mich noe neet
te vreug daen hemel in?

Maart 2013

de gangk is langk
alle deure geliek

luuj sónger wäörd
inkel geprevel

ouge gedouf
meug – krank
dan oplichtend

same nao boete
is effe óntsjnappe
besef van code duit pien

erm-in-erm
de natuur in

laeftied vanne buim besjtute
de vrieheid van ’t vee inne wei

de blomeprach
same van vreuger zinge

truuk nao de sjtilte

nag éin vraog
doe bliefs waal kómme?

Februari 2013

en inins
kruup de sjliek
vanne sjoon

jeuk de wolle wintjermutsj
bleuje de sjneeklökskes al

sjleit de maerel
inne sjtille aovend

richte de viole
häör köpkes weer op

höbbe de daker
weer koerende duufkes

moog de boetedeur
aope blieve

en jeuke de henj
óm ’t greun
oete gróndj te graje

Februari 2013

Dinkse ouch aan veir driekeunige?
Zitse mer al bie de sjtal.
Ich pak ze oet ’t pepier vól iever.
Waem dan dae veirde waere zal?
Caspar, Melchior, Balthazar …
Eine kemeledriever.

Januari 2013

sjtad bie nach

‘n cafédeur sjleit aope
meziek vluch de sjtraot op
en sjtrukelt weer truuk nao binne

vootsjtep en sjtumme
gaon in kadans
’t oetgesjtorve plein euver

eine fietser sjoert ane aovend
windj winsjelt zich dore buim
in late verhaole
vaal lich
vèlt door ein gats
van sjtraot nao sjtraot

inne duuster hoezer
regeert de nach
lach en traon versjtild

de klok – es insigste veursjpelbaar –
sjleit häör juuste sjlaeg
geine teväöl geine te min

de sjtad laef heurt zuut en zjwieg

de hemel sjteit vól sjterre
wie vónke vuur
vanne sjliepsjtein gesjpiejd

enne hemel zjwieg ouch

Januari 2013

jannewarie

’t daaglich wèrk al
mit langer zjwaegele
d’n duuster kruup
flótter veur mich oet

en sjtrak krieg ’t veurjaor
de faldera weer inne kop
en dans op hakkesjoon
’t greun oete gróndj

Januari 2013

kersmis 2012

blinketig

dök duit de ermood
in ’t geluive pien
mer kersmis wèrk
wie ein opgetroch gordien
en hilt de werreld
in get zachter greep
halt nao baove
vanoet ’t deepste deep
det kingerlik vertroewe
in bethlehems sjtal
in de gebaore redder
veur idder, van al,

leet ós loestere nao
wat gezónge waert
mit hert en zeel,
mak wat gebarsjte is
weer effe heel.

kerswermde inne sjtal
bie ’t vee
kerswermde – effe alles blinketig
ouch sónger sjnee.

December 2012

Sinterklaos nao Remunj

De’s gèn zunj, de’s gèn zunj
Want Remunj is zo sjoon
Óm mit de sjtoumboot aan te doon
De have aan Peries geliek
En gans vernuujd de sjtraot ane diek
Terrasse gezellig, lekker aete en drinke
Gaer zólle ze hie mit Sinterklaos klinke
En ’t echte Limburgs plat
Is hie al lang oppe kaart gezat.

Christoffel oppe tore höf ’t kindj extra hoog
Zodet ’t dit ganse sjpektakel volge moog
Al die kleurige kinger te kinne zeen, wie fijn
Op sjtasie, mert en munsterplein,
Die sjoon aw gevels, versierde sjtraote
Al die lempkes sjiene laote
Op nieks es goow berichte, blie gezichte
Det moog de sfeer van crisis gaer verlichte.

En… eerlik is eerlik:
’t Geef gèn sjtad in ’t landj, nae neet ein
Wo de maon sjónder door de buim kan sjiene
Es op ‘t Munsterplein

November 2012

krakedreug ’t blaad
vanne liesterkeersj fluustert
naozomergeheim

**

de vallende noot
ketsj morgesjtilte aope
hèrfsdaag gebaore

November 2012

dahlia

gister nag gans in ’t goud
de dahlia
sjtraolende naojaorskeuningin

nao de nach – naks –
in sjtilte oetgeklèd
sjtaart ze berves de nuje morge in

mer duit beseffe
’t is mer veur effe
dit wintjerbèd

haet ’t veurjaor
de rök gedrejd
sjtaon ich weer aangeklèd

November 2012

zo patert de hèrfs
vrech en ónbesuis
miene naozomer in,
sjnöt al wat nag effe
sjtraole kin.

sjtil zeumer ich
get lèste ougs,
beseffe  duit leid,
en kever ’t kindj
oet ’t  zomerkleid.

terwiel ich grantj
nao blievende bleuj,
langk ’t naojaor mien verwaer
de glans van sjtrieklich
euvere brónze paer.

ich heur de doefe ploef,
de aerd es sjoot,
en mót be-ame:
’t is wie ’t is,
ich zal mich mit ’t naojaor hame.

September 2012

krujend krómp gech ich bergop

veut biete zich vas
inne pendale
henj kniepe ’t sjtuur
wie in kramp
hèts brandj op miene kop
windj dae lóch oet mien lónge sjtriets
kingersjteulke laeg achterop

bön ouch ich toe aan de foetelfiets?

September 2012

zomer

richtig kaoreblóndj
kleurt zomer ’t aope veldj
windj weeg sjtil heimwee.

Augustus 2012

al sjnagerend aan naojaorsvruchte
is ’t genetend verzuchte:
doe hèrfs, wie sjoon!
wie sjoon die kleure –
die in ein deuske
te kinne doon
en zo noe en dan
det dekselke te luchte.

Augustus 2012

ich besjtuut de vogel,
bewónjer de roos,

num de natuur
wuis en sjterk.

waoróm dan dit kingerlaeve
zo gebraoke, zo broos,

wo noe de krach
vanne almach?

’t laeve toch neet allein
mer miensjewerk?

Juni 2012

5 mei

zing vogel, zing en jubel,
de vlag in top!
zing taenge ‘t
vrie geflaker
vanne vlagge op!
laot vrieheid wege
op ilke vleugelsjlaag
en gaef ‘m ein kans
oze droum:
’t laeve werreldwied
es vrieheidsdans.

Mei 2012

de sjtilte van de 4e mei

sjtil vogel, sjtil,
zing vandaag
mer jubel neet,
de vlag halfsjtok,
gemis wat vrit
wied weg van ’t gelök,
mer in die
twee minute sjtilte
haole veer häör
ummer weer effe trök.

Mei 2012

ach veugelke
zo vreug inne morge
al ’t veurjaor inne sjträöt

ich veulde mich
sjtil oppe sjtek
meug gebek

doe haols
d’n duuster weer oete gäöt
en brings
det sjtök
puur veurjaorsgelök

Maart 2012

vringe

wie de baek zich vrink
door ’t wintjers broen
op waeg nao veurjaorsgreun
zo vring ich mich
door vore en langs toen
sjravelend, reikend
nao haop – vertroewe – mood
wille gluive
’t kump good!

Maart 2012

de veurjaorsklanke
ligke floer in mien ore
zodet hel wäörd
get zachter kinne lanje

Maart 2012

meert

luuj wazele, prazele
mer man. man, man,
in deze meertse middig
kinne de veugel d’r ouch get van.
vruid of verdreet
ze hawte de sjnavel neet.
alles gans lich te vertaere
mer
ich mis de meister dae zaet
det d’r ouch geloesterd mót waere.

Maart 2012

windj sjniet
kaw biet
en sjaatsers sjrieve
in wintjers bedrieve
kalligrafie
op sjravel-ies

Februari 2012

en dan…
zo inins
sjaats de wintjer
euver sjpegelend ies

in kleur
neet gries

en aone gewich
kaw viemp langs ore en gezich

’t ies es wintjerweuning
hie vult d’r zich keuning

Februari 2012

de sjaatser
gebaoge
henj oppe rök
riejt zien rundsjes
hert vól gelök

mer de boer
óngedöldj
ómme móndj
kiek ’t gevreur
oete gróndj

Februari 2012

wit

de gróndj wit
de lóch wit
de morge wit
de middig wit
enne aovend
hoe nag sjnee in zit
hilt ouch de nach
nag effe wit.

Februari 2012

hoog water

éine grote sjpegel
éin groot wónger
hemel-wolke-zón
baove vèlt nao ónger

**

sjtols sjtóng de popelier
in ’t water vanne roer
zeker toet ane kneen,
blie mit zichzelf
hae hej zich zo lang neet gezeen.

Januari 2012

’t inj vanne wintjer in zich?
’t is dróm te doon!
’t veurjaor sjteit klaor
op gewiksde sjoon.

Januari 2012

jannewari

raenge zawwelt en zeivert
bringk sjliek, pratsj en toter

de lóch hingk sjtil te broeke

ein inkel wölkske wiek zich
en get zón nag sjleivert
euver sjtroek en boum
zo kejjelik te hoeke

sjliek, pratsj en toter
richtig jannewarigeknoter

Januari 2012

’t nuuj jaor
amper de raak gerak
zich al royaal de sjmaak
van veurjaor pak
leet ’t winsjele
inne móndj

mer… mót de wintjer
noe nag ín
of óet de gróndj

Januari 2012

kersmis 2011

zal de euro-crisis
oze kersmis rake
aete en drinke
minder sjmakelik make

wat laote v’r weg
‘t veur- of ’t naogerech

in krib en sjtal ocherm
is ’t sjlech keze
zie höbbe mer
zo gans winnig te verleze

örges waert
op aafvalhuip gekraope
óm te euverlaeve

waem mot ós
ós teväöl vergaeve

December 2011

kersmis

wied wiejer es gelouf wat wörg
blief kersmis toch väöl meer
es get ós veur de vot gesjörg

December 2011

oktoberzón ziep
in gouwe glorie vanne buim,
sjtriek nag neet de vaan,
mer reik ós zjwiegend
pure riekdom aan.

November 2011

verkiendjs

op nakse veut,
jao berves banjere
door de sjerve
van ’t verlees,
wie ein moder
die sjölk en sjoot mis,
de werreld laeg.

zal ’t nótse
kertse te branje
taengen ’t duuster?

November 2011

mitte franse sjlaag
waert nag get zón gesjleiverd
euver ’t krumpend  asterbèd

’t inj vanne zomer in zich?

de raenge langs mien vinster zeivert
… ich sjoever mich.

September 2011

zo sjtil, zo sjtil
dit zomers middigoer,
zich euvergaeve ane hèrfs
zo zoer en zoer.

Augustus 2011

traone

jank mer
zaet mich de raenge,
jank mer
dien traone van gemis,

zeen en veul
wie daonao
hemel en zeel
wie opgeklaord is.

al liek de welt
dök wie verzoerd,
’t geef gèn sjoel
die eeuwig doert.

Juli 2011

vlangerökske

kums dansend
euvere dörpel
in dien vlangerökske,
sjansend,
lónkend,
twinklende ouge,
zuusse mich?
wiebels
aone gewich
op míen hakkesjoon,
de haorbörsjtel
es microfoon,
waem bösse vandaag,
karen, kristel of josje?

wo mót det haer,
’t is pas veir,
mer wat zeen ich
dit joeksig  gedoons
toch gaer.
ich veul zien plezeer
toet in mien tene
en jao
’t is heel doonbie,
kin draan reike,
aan mien sjtökske
in zien gene.

Juni 2011

de veugel zinge
lokkend enne lente leet
zich gaer verleie

klumhortensia
klawt zich vas ane aw moer
greun euverrómpelt

wie ’t vreugere
zammet zo zach is ’t blaad
noe van ’t lóngkroed

koerende duufkes
wat vertèlle ze zich en
wat verzjwiege ze

maerels en mösje
flök oppe toen langs de haof
kalle plat mit mich

April 2011

jara

dao is ‘t
’t eerste sjtepke

iddere dörpel
ein trepke

de werreld
groot baovenal

veer wachte noe meis
op wat ’t muulke moele zal

nag sjnap ’t van kalle
neet richtig de gróndj

‘t vingerke
vervingk de móndj.

Juni 2011

van essik

van däörekroon
en kruuts
van essik
van god miene god
waoróm höbs se mich verlaote
van moderzeel allein
van sjterve
van kroek en aolie
en opnuuj gewingeld in deuk
van graaf en sjtein

van geluive
van ingele
en van thomas

April 2011

aloetela

raenge
trèk lauw traone-sjpaore
langs mien vinster
ich sjpäör dao-in
de glinster van
ei nuuj begin
’t veurjaor hilt
de aom nag effe in
mer haet vol óngedöldj
de wintjerraekening betald
en ’t eerste topje
is al oete la gehald

Maart 2011

riem

wintjer sjrief de kaw
neet in ’t klad
mer geliek in ’t net,
sjoonsjrif neump me det,
ich raak d’r neet
op oetgekeke…

en wat is gebleke,
hoe ‘t ‘m éch in zit?

de meister keek
euvere sjouwer mit.

Februari 2011

sjnee

reurloos witte daeke
euvere zjwarte gróndj
de werreld wach
mitte vinger oppe móndj

Februari 2011


wintjerjasmijn

en blie bleujend zits se
te sjtraole op nakse witse.

Februari 2011