Ouch zoe blie gewaes mit de verhaole euver daen Homerische zomer? Ich waal.
Noe mót ich veurzichtig waere euver ’t woveur ich blie woor..
Nou, ich bön benuujd. Woveur woors dich…?
Wiel ze zoe ónneuzel wore, die verhaole in de gezet. Of neum det ópgelierd, dan zitte v’r dao óngelierd taengeneuver.
’t Hanjelde zich euver iconische records, ’t naatste zjweithumme oets, terreskes laeg es de sónjisse homes,
heiter es de Sahara in september. Naord-Afrika in de binnesjtaej.
En meug det neet?
Zeker waal. De zomer aevel dae baeter luuj jaorelank gónge zeuke, woor noe eine ramp.
Records, jederen daag nuuj siefers, code gael, verbósbrandje dere.
En waat ich noets gedach kós höbbe: ‘Het schap bouwt aan een soort escalatieladder
die maatregelen koppelt aan een bepaalde hoeveelheid neerslagtekort.’
Gaon v’r zoeget in ’t Limburgs sjrieve wen deil III binne is?
Mae waat wils dich?
Ich dink det de meiste verhaole aan de computer gesjreve zien.
Ich vroog waats doe wóls.
Wóls? Vreuger? Twie jaor geleje. Ei gedrök blaad euver Oos Taal en Limburg, det zös maol sjaors versjient.
Enne?
Hiel verhaol. ’t Hoes veur ’t Limburgs vreug allewiel jederein dae Limburgs zaet te sjpraeke, zoeväöl meugelik sjoen Limburgse wäörd in te sjikke.
Die waere dan opgesjlage door eine nuje man van Maastricht University. Sjiekerdesjiek.
Ich vroog waat daomit gebäörde. Heurde nieks.
Nag ins gemaild. Doe waerde ich boetegesjmete. Ich hauw dao gaaroet nieks te zeuke.
Ouch de Limbörgse Academie is doonde wäörd te zeumere. Zeumere?
De väörzitter wilt d’r dartig miljoon biejeinbreinge, verklapde hae eine van de gezet.
Wen hae dao teen jaor euver duit, dan zól det biejnao 8300 wäörd sjtaags zien.
Sjtaags? Besjteit det waord waal? Ich kan väöl verzinne…
Sjatte Pie gevraog. Dae bleek sjlech in teksverklaore. Zuug:
Het woord sjtaags (ook wel gespeld als staags) is een Limburgs dialectwoord dat voortdurend, aan één stuk door, telkens of alsmaar betekent.
Het is direct verwant, geit Pie wiejer, aan het Nederlandse woord gestadig (denk aan de uitdrukking “de voortgang vordert gestaag”).
Ich begós te twiefele. Gestaag? Inins kump Pie mit get van mich, oet Platbook nómmer veer:
‘Sjtaags teveure en nag ins in de zomer zoeve 20.000 toerfitsers langs dezelfde buim, euver dezelfde cols’.
Ich vraog mich wiejer aaf waat mit die ingesjikde wäörd gebäöre geit.
Gans einfach: ze waere ge-di-gi-ta-li-zeierd (Zittersj). Sjient gein pien te doon.
Bietje verdouving. Sjiltj waal doezjende miele pepeer, ofwaal teen palenakkers, wie de miljeubewaeging de dor dennebus in Midde- en
Naord-Limburg neump: die wore besjtump veur sjtiepe in de miene. Ze zien dus neet mie neudig.
En noe?
Blief ich zitte mit get vraoge. Ouch de volgende: wore de teendoezjende, versjillende wäörd in ’t WLD (Woordenboek van de Limburgse Dialecten)
neet genóg? Dao is zeker vieftig jaor aan gewirk, door de universiteit van Numwaege, en later die van Läöve en Gent. Haet mier es ei miljoon
gölje gekos.
Vergaefs? Det zal toch neet waor zien… Allein al daoveur mót Veldgewas wiejer gaon.
En det gebäört. SesieL leut uch zeker neet in de sjteek.
Dank uch.
Homerisch
