Sjrieve euver sjrieve in/euver ’t Limburgs Juni 2026

’t Is mich neet gelök ein gooj vergelieking te maken tösse ’t Eurovisie Songfestival vurge maondj en Oos Taal, ’t Limburgs.
Ierste vraog: wieväöl van uch, geachde Veldgewassers, zólle noe neet wiejer gelaeze höbbe?
Gekke vraog? Hiejbaove zegk ich det mich get neet gelök is.
Anger veurbeeldj. Wen in eine riejer op pagina zeve sjteit det ’t liek neet gevónje waert,
det d’r mesjiens gaaroet gein liek woor, leus me dan toch wiejer? Waat wil ich noe weer?
Tja, ich höb neet väöl van det Songgedeuns gezeen. Allein get van de veurrunj.
Songe wie vreuger? Kóm noe: geweun duur sjpiktakel.
Kump ouch, nae: det is hiej al, paar waeke wachte.
Ei groot paerd vluug door de lóch en landj in ’t stadion van MVV – det toch aafgebraoke geit waere.
Op ’t paerd zit einen duvel. Dit is eine sjpiktakelmusical van Toneelgroep Maastricht.
Sjpiktakel, det waert ummer belangrieker. Veur Oos Taal beteikentj det:
’t geit neet langer um wáát gezag waert, of det mesjiens literatuur is, of get biejdreug aan de kwaliteit van’t gesjreve Limburgs.
Det ligk allewiel dreug te wachte aan de leste mem.
Belde daoveur nao SesieL, mae die zag det ze efkes aaf wól wachte.
Ich mós neet knotere op waat nag pas begós woor. Of op goodgemeinde planne.
Kiek nao premier Jetten, mailde ze: dae wól teen gans nuuj sjtaej oet de gróndj sjtampe wie me allewiel kalt.
Mich sjoot te binne waat polletieker Jan Schaeffer ós al veurhool: In gelul kun je niet wonen.
Mei 2026. Greun Links in de Sjtaote van Limburg vintj det in oos treine en lienbösse mier Limburgs gesjpraoke mót waere.
Hiel geweun: In Zitterd kónt geer nao Haerle mit Arriva. Dae trein sjteit op perron drei, en vertrek…
Ich weit neet good waat die Greune wille. Laote mirke det in Limburg angers gesjpraoke waert es in Hilversum?
Prima. Mae dao waert Oos Taal neet mit gered. Code Rood gultj nag ummer. Waert die nag platter es
Plat, leps wie mit Maaswater verdunde О.O?