100 Jaor Venlose Revue: ein uniek stökske Limburgse volkscultuur
De Venlose Revue besteit (ruum) hónderd jaor. Eine mielpaol dae neet onopgemerk veurbeej meug gaon. Waat in 1920 betrekkelik bescheide begós, is anno 2022 oetgegruid tot ein spectaculeer totaal-theatergebeure met toniel, zang en dans. Ein uniek stökske Limburgse volkscultuur, geprissenteerd in ein modern, professioneel jeske. De Venlose revue is ein begrip gewaore. Tot vaer boete Venlo. En de geschiedenis daovan steit noow op pepeer.
De breurs Cornet
De basis veur de Venlose revue woort gelag door de breurs Cornet die ‘theater’ in de gene hadde zitte. De jóngste, Sef, trok op tienjäörige laeftied met eine poppekas langs de klassen van zien liegere schoel. Same met zien breurs brach hae variéteveurstellige in de kelder van eur elderlik hoes, waobeej de kinder oet de buurt genuujd waore. As de breurs dan neet mier wiste hoe ’t vaerder meus gaon, goeijde d’n aldste, Sjang, eine eimer kald water door de kelderraam, waonao ’t publiek kliedernaat aafdroop.
1920: ierste Venlose Revue
In 1920 wooet de ierste Venlose revue opgeveurd, geschreve door Mathieu Corner en geregiseerd door Sef, dae teves de houfrol vertolkte. De gebeurtenisse in ’t jaor daoveur woorte op ei humoristische wieze taege ’t leech gehalde. ’T smakte nao vúúel mier. Eine reeks Venlose revues vólgde dan ouk. De belangstelling noom met de kier toe. Ouk boete Venlo woorte veurstellinge verzörg.
In 1953 kwaam Sef vreej plotseling te euverlieje. Ein jaor later storf ouk Mathieu. Umdet nemes ’t waogde in eur vootspore te treeje, leek d’r ein ind te kómme aan ein fantastische Venlose traditie.
Frans Boermans pak d’n draod weer op
’t Waas Frans Boermans, tot vaer boete Venlo bekind bekind as schriever van vastelaovesliedjes, dae in 1980 d’n draod weer oppakte. Hónderd jaor nao Cornets iersteling (door corona noow pas herdach) is de revue nóg altied springlaevend, getuge de suksesvolle letste produktie “De vlook van Hölster Heinke”, en det is beslis neet de letste.
Niej book euver de geschiedenis van de Venlose Revue
In ’t nieje booj “100 Jaor Venlose Revue” wuurt de geschiedenis van dit oer-Venlose fenomeen veur ’t iers in totaliteit oet de deuk gedaon. Oetgebreid aandach is d’r veur ’t Lachkenon Sef Cornet, de absolute sterspeuler tot ziene doeëd in 1953, ’t punctueel poepende bühnepaerd van Huub Berendsen, de wanhaopige stried um entreekaertjes beej de wedergeboorte van de revue in 1980, ’t unieke huweliksaanzek tiejes ein veurstelling van Schoëne Schien in 2016 en nóg vuuel mier. Laes, kiek en geneet.
“100 Jaor Venlose Revue” is geschreve door Paul Seelen en Finbar van der Veen. Allebei dees auteurs hebbe eur spore verdeend met tal van (regionale) publicaties. ’T Book is vanaaf 16 september te koup beej ’t Boekhuis, Grote Kerkstraat in Venlo en de Venlose boekhandel. Winkelpries: 22,50 euro. Wilt geej ’t book thoes bezörg kriege, laot det dan weite via 06-12557143 of via paul_seelen@live.nl