Presentatie Remunsje Psalme tekste Pater Jan Smeets

De presentatie van de oetgaaf door de Veldeke Krink Remunj haet plaatsgevónje op zóndaag 23 april, Blaoke Paose in de Kepel in ‘t Zandj in Remunj. Oet henj van dialectoloog Pierre Bakkes kreeg pater Jan Smeets o.s.b. (Ordo Sancti Benedicti) ’t eerste eksemplaar van ’t beukske aangebaoje.

De psalme zeen gezange oet ‘t Aad Testament. In alle christelike kirke waere ze gebroek. De oorsjprónkelike meziek daovan is verlaore gegange. Vertalinge van Biebeltekste in ‘n dialek zeen zeldjzaam. De meiste vertalinge in dialek höbbe tekste in ‘t Nederlands as basis. Dees neet!

Pater Sjmeets, ‘ne kinner van Aramees en Hebreeuws in oer-aaj en in modern vorm, is gans oetgegange van de aad-Hebreeuwse oerteks. Hae haet de tekste vertaald in ’t Remunjs.

’t Geheel waerde muzikaal ómlies door Etty Willemse-Kemp ónger begeleijing van Tim Giesbers mit inkele sjitterende, toepasselike Remunjse leedjes.

‘t Beukske kos € 5,00 (excl. portokoste) meh ‘t is al oetverkoch.

(Foto’s: Hans Simons)

 

← Ga terug