Cursus dialect sjrieve in ‘t Èlls

Naodet ze same ‘t Oranje Beukske “Plat Èlls, wie sjriefs se det?” höbbe samegestèldj, höbbe de naeve Jan en Paul Custers ouch ‘ne cursus dialect sjrieve óntwikkeldj.

Begin 2017, tiejes de fieëste van ‘t 66-jaorig jubileum van CV De Moerebuuk, is ‘t Oranje Beukske oetgebrachtj. Ouch is toen ‘ne cursusaovendj dialect sjrieve georganiseerdj mèt Pierre Bakkes. De ieëste reacties wore zoeë enthousiast det Jan en Paul beloofdje ‘ne echte, oetgebreidje cursus dialect sjrieve te gaon organisere in ‘t naojaor.

Dae cursus is gestartj en heet al 2 van de 3 aovendje in de prachtige BMV Ellenhof te Èll d’rop zitte. ‘t Lèsmateriaol is zelf gesjreve en geit veural in op ‘t Èller dialect. ‘t Geit óm ’t sjrieve van de klanke, verkleinweurd, wèrkweurdsvorme en probleemgevalle, alles kumtj aan bod. De aanpak is aeve simpel as efficiënt: vanaaf ‘t begin waere de cursiste aan ‘t werk gezatte en eder kieër nao ‘t make van ‘n opdracht volgtj drek de oetwèrking en/of toelichting op ‘t sjerm. Doorloupendj kónne vraoge gestèldj waere die Jan of Paul ter plekke probere te beantjwoorde. Dees maneer van wirke bringtj gelach en gezelligheid mer ouch waal ins discussie want de meininge versjille oeëts.

Det wae neet allemaol ‘tzelfdje kalle en sjrieve kumtj ouch tiejes deze cursus weer dudelik nao veure. Mer det is ouch neet ‘t doel waat Jan en Paul naostreve. ‘t Is al leuk as se zoeëveul meugelik minse ‘n maneer van dialect sjrieve kónst aanlieëre en zoeëdoondje de verloedering van ‘t dialect kónst aafremme. De ieëste cursiste weite waat heur te doon steit!

Of d’r eine vervolgcursus weurtj geplandj, is aafhankelik van de belangstèlling en de reacties van de cursiste. Mocht d’r eine kómme den weurtj snel genógtj bekindj gemaaktj wie minse kónne insjrieve en waat de köste zeen. ’t Oranje Beukske is nog te koup via de website van CV de Moerebuuk in Èll of via de Winkel op deze website.

(Ells)

← Ga terug