LIMx: nètwèrke in ’t plat

Op zakeleke bijeinkomste weurt zelde Limburgs gesproke. Nederlands is de voortaol, es al neet weurt euvergesjakeld op ’t Ingels. Dat kint anders, dach Harry Rouschop oet Sint Gietere. Limburgs is de taol die Limburgers in ’t hart raak en daomèt ’n ideaal middel um ideeje en ideale te deile. Boerum zouw dat bij zakelek kontakte anders zien?

Dat waor veur häöm de reie um ’t initiatief te numme veur LIMx. Oonder dee naom prizzenteert de gelieknaomege stiechting – mèt e knipeugske nao ’t succesvol TEDx – ’n roondtrèkkende nètwèrkbijeinkoms boe-in oetsletend Limburgs gesproke weurt. Tijdens die bijeinkoms hawwe drei gassprekers ’n veurdrach in hun eige streektaol en weurt ouch live Limburgstaolege meziek gemaak. Doelgróp is ’t Limburgs bedriefsleve en de Limburgse gemeinte.

‘t LIMx-program

Opdrachgevers kinne LIMx inheure veur door hun oet te nudege zakeleke realties. Es vaste sprekers zien gearrangeerd:

• Lex Uiting oet Venlo. Wèrkzaam in Hilversum es radio- en tèllevisieprizzentator. En de lèste jaore veural bekind door de documentaire ‘Nao ’t Zuuje’. Heer vertèlt euver de versjèlle die heer ervaart bij ’t spreke vaan dialek en Nederlands.
• Cabaratière renate Reijnders.  gief ’n humorcollege in ’t dialek.

Daoneve is ruimte voor ‘ne wisselende spreker, gerelateerd aon de branche vaan d’n opdrachgever. De prizzentatie is in han vaan Ruud Kleinen, bekind vaan L1 Radio en TV. De L1 Cultuurquiz Kwizzele vörmp ouch oonderdeil vaan ’t program. Meh de nètwèrksessie nao aofloup is – vaanzelfsprekend in ’t Limburgs – minstens eve belaankriek.

Mie informatie?

Partners vaan LIMx zien (neve Veldeke Limburg) de provincie Limburg, L1, de Rabobaank en de Raod veur ’t Limburgs.

Wèlt geer mie informatie euver LIMx, nump daan gerös kontak op mèt Harry Rouschop (06-51544004 of per e-mail) Of kiek op de website vaan LIMx.

NB: Veur de fiesmaond is ’n speciaol Keerseditie besjikbaar, leuk es inleiing veur de Keersborrel