Veldeke oonderzeuk: Conclusies
- In ‘t verleie is al dèkser de noedklok gelojd veur ‘t veurtbestoon vaan de Limburgse taol. In feite is dialekvereineging Veldeke bekans hoonderd jaor geleie opgeriech um d’n ouch toen al gevreisden oondergaank vaan ‘t Limburgs te veurkoume. Es veer noe ‘n iew later constatere tot nog dreikwaart vaan de inwoeners vaan de provincie Limburgs sprik, daan zouwste mage zègke tot ‘t al mèt al nog wel mètvèlt mèt dat verval.
- Toch blieve de veuroetziechte veur de touwkoms zörgelek. De veerdegheid um Limburgs te spreke nump aof naomaote me jonger is. Oonder de jongs gemete categorie (18-34 jaor) sprik nog mer 52% vloeiend Limburgs oonderwijl dit bij d’n awste gróp (65+) nog 74% is. Es deen tendens ziech doorzèt zouw dat beteikene tot de Limburgse taol binne e paar ginneraties ‘n minderheidstaol is.
- Ein en ander liet oonverlèt tot mie es 80% vaan de Limburgers positief steit tegeneuver de Limburgse taol. En mer ‘n klein minderheid vaan 4% zeet negatief geveules dao-euver te höbbe. Dat beejt mèt ander wäörd ‘ne gooje basis um ‘t Limburgs te bevordere en veur de touwkoms te bewaore.
- Tot die bevordering zal mote beginne bij de jonger ginneratie ligk mèt ‘t oug op de oetkomste vaan dit oonderzeuk veur de hand. En tot ouch bij de leeftiedsgróp 18-35 jaor nog mie es 70% positief steit ten opziechte vaan ‘t Limburgs, maak die operatie zeker neet op veurhand kansloes.
- Veldeke heet daan ouch de aondach veur de Limburgse taol in ‘t oonderwies, vaan kinderdaagverblieve tot middelbaar sjaole, es ein vaan de speerpunte vaan häör touwkomsteg beleid gemaak.
- Tot ‘t Limburgs onder jonger Limburgers neet hielemaol oet beeld verdwijnt maag blieke oet ‘t feit tot mie es de hèlf vaan de inwoeners tösse 18 en 35 jaor bij WhatApp verkier ouch in ‘t Limburgs sjrijf. Alle reie veur Veldeke um ouch aondach te besteite aon ‘t propagere vaan de Limburgse taol via sociaol media.
- Daomèt is medein ‘n twiede speerpunt geneump vaan ‘t beleid wat door Veldeke is vasgelag in häör Visiestök Op waeg nao ‘n leve lank Limburgs. Daobij slut ‘n derde speerpunt nej aon: ‘t oontwikkele vaan nui streektaolprodukte en deenste die kinne weure touwgepas in ‘t oonderwies, de openbaar ruimte en de wèrkumgeving mèt es doel ‘t spreke en sjrieve vaan ‘t Limburgs te normalisere.
- De positief groondhawding die e groet deil vaan de Limburgse bevolking heet euver ‘t Limburgs en ouch euver Veldeke es belangevertegenwoordeger daovaan, beejt genóg aonknoupingspunte um die speerpunte te effektuere.
- ‘t Traditioneel beeld tot Veldeke ‘n club vaan awwerwètse grijs maander zouw zien, is nog neet gans oetgeroejd meh ‘t feit tot de vereineging door ‘n ruim mierderheid ouch es belaankriek, deskundeg en nötteg weurt gezeen beejt ‘ne basis um op wijer te bouwe.
- ‘n Professioneel opgezatte communicatiestrategie um ein en ander euver ‘t vootleech te bringe is daoveur ‘n nudege conditie.
Es geer ‘t compleet rapport vaan ‘t Veldeke oonderzeuk wèlt inzien, daan kint geer hei klikke.