Zes neeje kienderpreentebuūk ien ‘t Venrods viēre Limburgse taalriekdòm

De Limburgse streektaal kriegt ennen bezoondere stiemelâns mit ‘t uutkòmme van zes neeje kienderpreentebuūk ien ‘t Venrods, ‘t dialekt van Venroj. De buūk zien spesjaal vertaald um jònge laezers speulenderwiēs kennes te laote make mit eur aege taal en kultuūr.
De vertalinge zien verzörgd dur Mariel van den Munckhof-Gommans, sikkertaris van de Veldeke Kring Venroj. Mit veul gevuul vur taal en streek het zeej bestónde kienderpreentebuūk van Ron Leunissen umgezet nor toegánkelek, levvendeg Venrods, geschikt um vur te laeze én same te òntdekke.

VeldekeJubileum
De uutgaaf sluut án beej ‘n bezoonder memént: ien mej 2026 bestöt Veldeke Limburg 100 jaor. Al ennen ieëw zet Veldeke Limburg zich ien vur ‘t behâld, ‘t gebruuk en de aoverdrácht van de Limburgse taal ien al ur vörme en dialekte. ‘t Uutbrenge van kienderbuūk ien streektaal oonderstript die missie en richt zich naodrukkelek òp neeje ginnerasies.
‘t Jubeleejum van Veldeke Limburg wert ien mej 2026 fieëstelek geviērd mit enne kòngresdág ien Sittárd. Tiejes dizzen dág stón de Limburgse taal, ur toekòmst en ur rieke verschejjenhejd sentraal. De Venrodse kienderpreentebuūk vörme daorbeej ‘n kònkreet vurbeeld van hoe dialekte laevend kunne werre gehâlde – nie allenneg dur volwassene, már juust dur en vur kiender.
Mit dees zes buūk wert ‘t Venrods durgegaeve as iets um gröts òp te zien: ‘n taal um ien te laeze, te láche en te droeëme.
Ron Leunissen gräöjde òp ien ‘t Zuud-Limburgse Nuth. Sinds 2016 schriēft en ielestrieërt heej kienderpreentebuūk. Verschejjene buūk van zien hând zien verschene ien Limburgse dialekte.
Mieër ienfermasie is te viende òp: https://www.zivauitgeverij.com