Biografische informatie euver Jan Maas

Jan is op 24 augustus 1938 gebaore in ‘t hertje van de stad Venlo. Hae greujde op, doeën beej ‘t Gaasplein, de St.Martinuskerk en op nog gen hónderd maeter van de Maas, die in Venlo de Majjem wuurt geneump. In de St.Martinuskerk waas hae jaore achterein misdener. Nao de liegere schoeël en de technische schoeël ging hae werke as automonteur. Ziene wins, al vanaaf de liegere schoeël, waas lieraar autotechniek waere. Dao meus hae ‘n bewies veur hebbe det hae mier as zes jaor praktijkervaring  had opgedaon. Naodet Jan op de aovend H.T.S. in Eindhoven zien Nijverheids akte haolde begós hae, in 1964  mit lesgaeve op alle nivo’s van ‘t autovak. Det deej hae op de technische schoeël veur vervolgopleidingen in Remund.

Jan werkde mit aan ‘t make van ‘n landelijk modern lierprogram veur zien vak. Wie hae d’rachter kwaam det ‘t vak Nateurkunde eigelik ‘t gróndvak veur alle technische vakke waas, haolde hae in de aovendore zien bevoegdheid um dao les in te kinne gaeve. Ouk de scheikunde bevoegdheid haolde hae en goof dao les in.  Alles beejein werkde Jan 45 jaor waovan 36 jaor as lieraar. Tössendoor waas hae twieë jaor verplich soldaot. Spiet haet Jan dao neet van. Hae lierde dao erg vuuel euver zien vak.

Same mit zien vrouw, Wil Vosbeek en twieë kinder, verhoesde Jan in 1969.  Iers nao Remund en 14 maond later nao Melick. Hae is óndertösse al 54 jaor getrouwd en gruuetse opa van dreej kleinkinder. Jan haet plezeer in ‘t schrieve van korte verhaole en gedichte in zien eige dialek, ‘t Venloos. Hae waas beej de oprichting van de Schrieverskrink Midde-Limburg en waas de ierste tieën jaor de veurzitter. In 2016 stopde hae daomit.

Jan woort in 2014 lid van de redactie van ‘t Veldeke Venlo vereinigingsblaad. Veur die vereiniging makde  hae ‘n nie logo. Hae stopde in 2017 mit ‘t redaktie werk. In 2007, 2008, 2009 en 2010 kwame d´r beuk van Jan oet in ´t Venloos.  In 2011 goof Jan ´n book oet in ´t A.B.N mit as titel: “Kiezen lukt even niet.” Alle beuk waere oetgegaeve beej oetgaeverie Boekscout in Soest.

De pap en de mam van Jan hadde ‘ne greunte-en fruitwinkel in hertje stad Venlo. Zeej speulde in de dertiger jaore mit in de bekinde Venlose revue van Sef Cornet. Naeve ‘t schrieve haet hae nog ‘n groeëte passie en det is de tennissport. Hae zoot in ‘t oprichtingsbesteur van de Melickse tennisvereiniging en is dao al 46 jaor lid van. Vief zusse en twieë breurs had Jan. Eine broor is jammergenóg erg vruueg gestorve. De andere laeve gelökkig nog.

(Venloos)