Nuie veurzitter Veldeke en route

De nuie veurzitter vaan Veldeke Limburg, Christine van Basten, geit de koumende maonde e Rundsje Limburg make. Dat wèlt zègke tot ze ein veur ein alle lokaal Veldekekring e bezeuk geit bringe. Um ziech zelf veur te stèlle meh veural um te luustere nao wat in de kring leef. De veurzitter wèlt gere wete boe de kring mèt bezeg zien en wat hun beweeg um ziech veur de Limburgse taol in te zette.

In ’n groete organisatie wie Veldeke is de oonderlilng communicatie tösse ’t provinciaol bestuur en de lokaal kring vaan essentiel belaank. ’t Provinciaol bestuur zuut ’t es zien taak de kring op alle meugeleke menere te facilitere. En um dat te kinne doen moot dat bestuur good op de huugde zien vaan wat ziech in de versjèllende lokaal kring aofspäölt en boe behoofte aon is.

Luustere en vraoge

Dus de veurzitter kump nao de lokaal bestuurders um te luustere meh ze heet ouch ’n deil vraoge paraat boe ze gere antwoord op wèlt wete. Ein vaan die vraoge zal zien nao de gemeinsjappelekheid  tösse de versjèllende kring oonderling en mèt ’t provinciaol bestuur in ’t bezunder. Wat verbindt de kring oet Mestreech mèt dee oet Venlo en mèt dee oet Ech en zoe wijer, oondaanks alle versjèlle die d’r in dialek en cultuur tösse die plaotse mage zien?

Veer hope tot de nuie veurzitter in alle kring ‘ne wermen oontvaangs tegemoot maag zien en tot ’t tot de gesprekke tot e vröchbaar rizzeltaot mage leie. De veurzitter zal us in eder geval op de huugde hawwe vaan häöre roondgaank en via website en Facebook verslaag doen vaan häör ervaringe. Zoe is zie neet de einege die get devaan liert. De veurzitter zal op häör runde door de provincie vergezèld weure door Ron de Louw, de eveneins nuie sikkertaris vaan ‘t provinciaol bestuur.