WhatsAppe in ‘t Limburgs

Limburgs spreke is ein dink, Limburgs sjrieve is weer get anders. Vaan deginnege die de Limburgse taol mondeling al daan neet gebrekkeg beheerse, gief de helf (50%) aon noets in ‘t Limburgs te sjrieve. De ander helf gebruuk wel ins Limburgs bij ‘t sjrieve vaan e-mails (17%), op sociaol media zoe wie Facebook en Twitter (19%) en bij WhatsApp verkier mèt femilie of vrun (42%).

Dat lèste percentaasj is opvallend hoeg en dat weurt mèt naome veroorzaak door väöl jonger lui oonder de 35 jaor die Limkburgs sjrieve bij ‘t gebruuk vaan WhatsApp, naomelek 52%, oonderwijl ouch de leeftijdscategorieje 35-49 jaor mèt 44% en de gróp 50-64 jaor met 46% ziech neet oonbetuig laote. Allein de 65 plussers laote ‘t bij WhatsApp e bisje aofwete mèt mer 29% meh dat weurt woersjijnelek veural veroorzaak umto zie minder gebruuk make vaan dat medium. Zie gebruke daan weer relatief mie dialek bij ‘t sjrieve vaan e-mails in vergelijking mèt jonger Limburgers.

Grafisch zuut dat es volg oet:

Limburgs sjrieve per medium (%)

Veer dinke te wete tot nogal get lui ziech neet touwvertrouwe in ‘t Limburgs te sjrieve umtot ze neet zeker zien vaan de spelling die daobij gebooje is. Veldeke heet in ‘t verleie nogal ‘ne naom opgebouwd es sjerpslieper boe ‘t de spelling vaan ‘t Limburgs betröf. Meh es dat al zoe gewees is, daan zien veer dao toch e bitteke vaan trök gekoume. Veer blieve de spelling vaan eus taol belaankriek vinde en bevele eus Spellngsadvies 2003 nog ummertouw vaan harte aon, meh zien ouch tot de euvertuiging gekoume tot me beter neet gans volgens de regels kint sjrieve es hielemaol  neet sjrieve. De jonger lui hove veer dat klaorbliekelek al neet mie dudelek te make.

 

← Ga terug