Aafschied van Henk Buskes

Op donderdaag 7 september hebbe ózze veurzitter, Reg van Loo, en penningmeister, Pieter Ebus, ein bezeuk gebrach beej Henk Buskes dae door ein ernstig hersenletsel opgenaome is in ‘t verzörgingstehoes Auxiliatrix in Venlo, en dao zien vaerdere laeve zal mótte verblieve.

Reg van Loo haet met werme wäörd Henk bedank veur ziene inbring beej zoeëwaal ‘t Provinciaal Besteur van Veldeke as ouk as veurzitter van de Krink Venlo. Met name zien werk veur de declamatiewedstried en d’n daag van de Moodertaol woorte door Reg aangehaold.

Henk waas vanaaf 2015 aktief binne ‘t Provinciaal Besteur en al langer aktief as Veurzitter van de Krink Venlo. As dank veur al det werk hebbe weej Henk, in euverleg met zien vrouw Harriëtte, ein foto op canvas aangebooje van ‘t Stadhoeës van Venlo. veur Henk “zien stedje van lol en plezeer”.

Det Henk emotioneel ‘t kedoo in óntvangs haet genaome, zal óg neet vraemp euverkómme en Henk haet ós gevraog um met dit berich idderein te bedanke veur de prettige samewerking in de aafgeloupe 8 jaor en det doon weej dan ouk met vuuel plezeer.

Weej wille de haop oetspraeke det Henk same met zien femilie toch positief veuroet kinne kieke en det haope weej dan ouk van herte.