Prizzentatie Platbook 21: Gans Greun

Op goonsdag 12 juni aonstaonde um 19.30 oor weurt in kaffee De Tramhalte in Remund Platbook 21 geprizzenteerd. Dit 21ste deil in de rij blomlezinge in ’t Limburgs dialek steit oonder redactie vaan Ger Koopmans en Geert Gabriëls en heet es thema ‘Gans greun’. Daobij kint greun netuurlek versjèllende beteikenisse aonumme, ’n meugelekheid boe de 35 auteurs oetgebreid gebruuk vaan höbbe gemaak. In totaol sjikde bekans negeteg auteurs oet de ganse provincie werk in. Dao-oonder zien bedreve auteurs die al ‘ne gooje naom höbbe opgebouwd in de Limburgse dialekliteratuur, meh ouch versjèllende nuikoumers. ’t Waor veur ’t iers tot twie redacteure ziech aon de selectie vaan de boondel höbbe verboonde.

Député Koopmans en wethawwer Gabriëls höbbe 37 tekste oetgekoze die hun ’t mieste aonspreke, bereure ezw. Zie höbbe alle tekste drei kier doorgenome um ’n käös te kinne make. Ze höbbe lang euver die käös gesproke. Op basis vaan ’t thema, de kwaliteit en spreiding kaome zie tot 37 tekste. Daobij höbbe zie hun eige oetgaankspunte vaan ‘éine per sjrijver’ los mote laote. Allebei de hiere höbbe d’r ech werk vaan gemaak en lang dreuver naogedach um tot dees käös te koume.

Platbook 21 is evenes alle veurgaonde nómmers veur 9,90 euro te koup in versjeie Limburgse bookhandels en via de website vaan d’n oetgever www.ticshop .nl