Twiede editie Festival Sjiek

27-01-2019 11.00 uur - ECI Cultuurfabriek, ECI 13 Roermond

Op zoondag 27 jannewarie vint in de ECI Cultuurfebrik in Remund vaan 11.00 tot 18.00 oor de twiede editie plaots vaan Festival Sjiek. Toppers oet ’t Limburgs cultureel leve geve acte de présence, versjèllende auteurs leze veur oet eige werk, dao weure fèlms vaan Limburgse makelij in samewèrking mèt CineSud getoend en muzikante vaan topnivo trejje op. Tijdens ‘t gratis touwgaankelek festival steit ’t gesjreve, gesproke en gezoonge Limburgs én Nederlands woord centraal. ’t Festival is ’n initiatief vaan ‘t Taol en Lèttere Platform (TaLep) en weurt financieel meugelek gemaak door de provincie Limburg en de gemeinte Remund.

Reprise vaan Opera El Rey

D’n oondertösse legendarische dialekopera El Rey (euver Jos van Rey) krijg tijdens Festival Sjiek ’n einmaolege reprise. Fenna Ograjensek, Sef Thissen en Suzan Seegers speule deze door Frans Pollux gesjreve opera es aofsleting vaan ’t festival in d’n theaterzaol . In de popzaol zal Vandale, de ierste oet Sittard aofkomstege Nederlandstaolege hardrockband, laote hure tot ze nog altied steveg werk kinne aolflievere. CineSud zörg veur ’n serie fèlms vaan Limburgse groond mèt de makers die teks en oetlag geve. Cabberèttière Renate Reijnders späölt ’n deil vaan häör huidege veurstèlling.

Sjiek Literatuurpries veur streektaol

Ouch de Limburgse sjrijvers stoon weer in ’t zunneke. Nederlandstaolege auteurs vaan jäögbeuk zoe wie Jacques Vriens, Margot Wigglesworth-Senden, Manon Berns en Tim Gladdines en ander dialekauteurs drage veur oet eige werk. De intermezzo’s weure gevörmp door luustermeziek vaan Jo Erensprieswinner Harold K en de röstege rap vaan Rafael Rozenblad.

De Sjiek Literatuurpries geit dit jaor nao ‘ne in ’t Limburgse sjrievende auteur. ’nen Dreikoppege jury, bestaonde oet Daan Doesborgh, Pierre Bakkes en Jolien Linssen, buige ziech euver daartien ingesjikde wèrke en maak op 27 jannewarie de winner bekind. Dee krijg e bedraag vaan 1.500 euro en d’n opdrach mèt zie werk ’n aontal sjaole te bezeuke.

Essentièl oonderdeil vaan ’t festival is ‘ne workshop- en lezingeprogram mèt oondermie ’n humorcollege en ‘ne workshop veur kinder, boeveur me ziech via info@festivalsjiek.nl kint insjrijve. Deilnaome is gratis. Kiek veur mie informatie euver ’t program vaan Festival Sjiek op de website vaan ‘t festival.

← Ga terug