Veurjaorsaovend Veldeke Krink Um Mamelis
Veldekrink Um Mamelis hèlt op goonsdag 17 aprèl in de Kloesterbibliotheek in Wittem de jaorlekse veurjaorsaovend. Veur de meziek zörg deze kier zangeres Linda Zijlmans; veur verhaole en gediechte zörge Annie Franssen oet Eys/Sumpelveld en Ger Prickaerts oet Heerle. D’n aovend begint um 20.00 oor, d’n entree is € 7,50. Lede vaan veldeke betaole 5 euro. Rizzervere kint bij Jef Bauers, 06-10212183 of via jbrauwers@ziggo.nl.
Linda Zijlmans
Linda Zijlmans is ’n väölzijdege singer-songwriter die mèt häör krachtege stum en pakkende oetstraoling veural bij häör live-optrejjes gans tot häör rech kump. Häör leedsjes koume rech oet ’t hart. ’t Zien Limburgse leedsjes die ech rake, pop met e vläögske Americana. Linda Zijlmans vertèlt klein en groete verhaole in die leedsjes, mèt thema die veur ederein herkinbaar zien.
In 2010 en 2017 woort zie genomineerd veur de Jo Erenspries (Nach vaan ’t Limburgse leed). Samewèrkinge speule ’n groete rol in de muzikaol carrière vaan Linda. Zoe maakde ze meziek mèt Maud Willems en Dyanne Sleijpen binne ‘t projek “Op Geveul”. In ’t veurjaor vaan 2018 maakde ze ‘nen tour door Limburg mèt singer-songwriter Skinnie. Hun duo-veurstèlling hètde “Tösje Venlo en Zitterd” en kraog e sjoen vervolg in ’t naojaor vaan 2018. Linda’s single “Herfs” woort toen door L1 oetgerope tot bèste leedsje vaan 2018 en Linda zelf woort oetgerope tot bèste Limburgse zangers vaan dat jaor.