Algemein Lede Vergadering Veldeke Limburg

Op 9 mei j.l. kaome vertegenwoordegers vaan de lokaol Veldeke kring
bijein in ECI Remund veur de haafjaorlekse ledevergadering. Tijdens die vergadering woort oonder mie aofsjeid genome vaan twie aoftrejjende lede vaan ’t provinciaol bestuur. Op de ierste plaots vaan Kiki Huijnen die nao ‘nen termijn vaan 4 jaor häör drökke werkzaamhede bij oonderwieskoepel Movare neet langer nao behure kós combinere mèt ’t lidmaotsjap van ’t Veldeke bestuur. Kiki heet ziech in die 4 jaor ingezat um de Limburgse taol in ’t oonderwies de plaots te geve die ze verdeent en dat neet zoonder succes. Veurzitter Reg van Loo bedaankde häör mèt lovende wäörd en ‘ne bos blomme.

Lei Heijenrath ierelid

’t Twiede bestuurslid wat aofsjeid naom waor Lei Heijenrath. Lei heet 26 jaor deil oetgemaak vaan ’t provinciaol bestuur vaan Veldeke Limburg en dat maag gerös ’n prestatie op ziech weure geneump. Meh die prestatie krijg pas ech gestalte es veer zien verdeenste veur de Limburgse taol bekieke. Zoe waor heer nej betrokke bij de erkinning vaan ’t Limburgs volgens ’t Handves vaan de Europese Kemissie, waor heer gewaardeerd lid vaan de Raod veur ’t Limburgs, d’n adsviesraod veur de Limburgse taol vaan de provincie, waor heer ein vaan de groondlèggers vaan ’t Hoes veur ’t Limburgs wat noe in de steigers steit en heer waor bijgevolg ’n vraogbaak veur ederein dee get wouw wete euver de Limburgse taol en de historische oontwikkeling daovaan. Ex-veurzitter Lei Pennings, dee jaorelaank mèt Lei Heijenrath samewèrkde waor speciaol gekoume um zie veurmaoleg collegabestuurslid lof touw te zwejje. Jaomer genóg kós Lei Heijenrath zelf vaanwege privé umstandeghede neet aonwezeg zien, meh dat verhinderde de vergadering neet um häöm bij acclamatie te beneume tot ierelid vaan Veldeke Limburg.

 

De Statute obbenuits bekeke

Wijer stoonte de gebrukeleke formaliteite vaan ’n vereineging op d’n agenda vaan de ALV, zoe wie de goodkäöring vaan ’t Jaorverslaag en ’t Financieel Jaorverslag, wat woort aofgeslote mèt de décharge vaan ’t bestuur. Mie tied en aondach woort besteid aon de al langeren tied sleipende kwestie vaan de stumverhawding tösse de versjèllende lokaol kring. Noe is ’t zoe tot edere krink per 50 lede ’n stum heet. Dat beteikent tot de krink Mestreech, dee wiedeweg de groetste is, in princiep in staot is um eder beslissing te bepaole of te blokkere. Umtot nui wet- en regelgeving toch al aonleiing waor um de Statute vaan de vereineging te herzien, had ’t bestuur gedach mèt e beroop op ’t solidariteitsprinciep de stumverhawding mie in balans te bringe en ’n ander staffel in te veure boedoor de stum vaan Mestreech minder doorslaaggevend zouw weure. Meh dat waor op de tiene vaan Mestreech getrooje. De Krink Mestreech sjreef zelfs ’n peiling oet oonder zien lede um te vraoge wat die devaan voonte. En wat dach geer: de lede voonte ouch tot Mestreech zien stumme mós behawwe wie ze waore. ’t Provinciaol bestuur geit ziech noe obbenuits beraoje en kump mèt e nui veurstèl um ein en ander te regele. Weurt vervolg.

 

Lede aontalle Veldeke Limburg loupe trök

’n Ander agendapunt waor de oontwikkeling vaan ’t lede-aontal vaan de vereineging Veldeke Limburg. Dat löp al ’n aontal jaore geleidelek trök. De groetsten houp opzègkers kaom veur rekening vaan Mestreech, die nogal get lede zaoge aofhaoke wie ‘t Veldeke Vastelaovendscabbarèt demèt opheel. Meh ouch woort es oerzaak aongegeve veur d’n trökloup tot jonger lui ziech neet mie wèlle binde door e lidmaotsjap meh mie ad hoc bepaole boe ze hun cent aon oetgeve en hun energie aon besteie. Dat is beveurbeeld veur de Krink Mestreech aonleiing um ziech minder te riechte op ’t werve vaan nui lede meh mie aondach te besteie aon ’t organisere vaan 3 of 4 jaorlekse eveneminte veur ederein dee debij wèlt zien en die op termijn ouch rendabel mote weure door ’t heffe vaan entree. Meh wat ouch dudelek woort is tot ummer mie kring neve ‘t lidmaotsjap vaan Veldeke Limburg ummertouw mie inzètte op ’t werve vaan “vrun” of “donateurs”, die wel e bepaold bedraag geve aon de lokaole krink meh neet mie aofdrage aon Veldeke Limburg. Daan is ’t neet vreemp tot ’t ledetal vaan Veldeke Limburg achterblijf.

Hoes veur ‘t Limburgs

Ander oonderwerp vaan gesprek waor oeteraard ’t Hoes veur ’t Limburgs wat noe laankzaamaon concrete vörm begint aon te numme. Dao is al ‘ne zoegenaomde “verbinder” aongestèld in de persoen vaan Rob Benders, dee es ierste taak heet de versjèllende initiatiefnummers same te bringe oonder eine vlag en en gezamelek program. Wijer is ouch al ’n käös gemaak veur e communicatrieburo wat de website en de introductiecampagne vaan ’t Hoes geit oontwèrpe. En zoe gaw ’t Huis voor de Kunsten ’n nui locatie heeft gevoonde veur zie kentoer wete veer ouch boe ’t Hoes vaan ’t Limburgs fysiek gehoesves zal weure. Nao aofloup woort de vergadering nog bezegeld mèt ‘ne gezameleke borrel en kós ederein weer trök nao boe heer of zie vaandan kaom.