Algemein Ledevergadering Veldeke Limburg

Op dinsdag 8 mei voont weer de haafjaorlekse ledevergadering vaan Veldeke plaots. Wie gewoenlek kaome de bestuurslede vaan de lokaal kring in Remund bijein um vaan gedachte te wissele euver ’t beleid vaan vereineging. En dao waor genóg te bespreke deze kier.

Daag vaan de Moojertaol

Mèt plezeer woort trökgekeke op de viering vaan d’n Unesco Daag vaan de Moojertaol op 21 fibberwarie. In ’t bezunder de Veldeke Krink Mestreech had ziech in de boch gegoeid door alderlei activiteite te oontploeje, vaan ‘t plakke vaan affiesjes door de ganse stad tot ’t same mèt de Universiteit organisere vaan e symposium euver ’t belaank vaan streektaole. E paar ander Veldeke kring hadde ziech dao bij aongeslote meh dat bleef toch get achter bij watste zouws mage verwachte. Beslote is um in eder geval eder jaor aondach te goon besteie aon deen Daag vaan de Moojertaol. Um deveur te zörge tot de activiteite neet beperk blieve tot de hoofstad, weurt bekeke wie ’t zoe georganiseerd kint weure tot eder jaor ‘nen andere lokale Veldeke Krink de kaar geit trèkke bij ’t organisere vaan activiteite. Veldeke Krink Mestreech zal zien drejbook veur deen daag besjikbaar stèlle veur naovolgers.

Algemein Verordening Gegevesbesjerming (AVG)

Eder vereineging krijg demèt te make dus Veldeke zal dao ouch aon mote geluive, de nuie Europese privacywet dee vaanaof 25 mei in wèrking trejt. Gelökkeg kinne veer gebruuk make vaan e stappeplan wat veer höbbe gekrege vaan ’t Hoes veur de Sport Limburg. Meh daan nog mote d’r ‘ne ganse boel maotregele genome weure um de administratie aon de regels te laote voldoen. Zoe moot zjus weure vastgelag wee touwgaank heet tot de admnistratief gegeves die veer vaan aus lede bewaore. En die lede mote zjus kinne naogoon wat veur gegeves tot veer vaan hun bewaore en boe veer die veur gebruke. Väöl vraoge zien d’r euver ’t gebruuk vaan foto’s op websites of Facebook. Formeel moot ederein dee op ’n foto vaan Veldeke veurkump touwstumming geve veur publicatie, ouch es ’t beveurbeeld geit um foto’s vaan de koumende Declamatiefinale. Dao weurt ‘ne banner veur gemaak dee bij d’n ingaank vaan de zaol kump te stoon boe-op dudelek weurt gemaak tot wee neet op ’n foto wèlt stoon, ziech veuraof moot melle. Dao vèlt nog hiel get te doen. ’t Provinciaol bestuur is aonspreekpunt veur vraoge of suggesties, meh de kring höbbe hun eige verantwoordelekheid. Veur 25 mei aonstaonde zal e privacy-protocol weure opgemaak wat op euze website geplaots zal weure.

Nota Streektaolbeleid vaan de provincie

Heer had d’r eigelek al lang mote zien meh de Nota Streektaalbeleid vaan de provincie liet nog eve op ziech wachte. De reie daovaan is tot de organisaties die ziech mèt de Limburgse taol bezeg hawwe neet bepaold content waore mèt de concep-teks dee de runde deeg. Wat volgens de ierste reacties oontbraok in de nota waor ’n touwkomsbestendege visie die veur de koumende jaore ’n structuur aongief boebinne ‘t Limburgs de plaots (en de cent!) krijg die ’t touwkump um de ambities vaan de provincie op dat gebeed woer te make. Veldeke pleit veur ’n centraal orgaan, veurluipeg evekes es “Limburghoes” betiteld, wat de autoriteit en de middele heet um ’t streektaolbeleid vörm te geve. Meh veurtot dao-aon tegemoot kint weure gekoume zal d’r iers ’n degeleke analyse gemaak mote weure vaan wat ziech allemaal aofspäölt in ’t streektaolveld, wat veur organisaties daobij betrokke zien en wat veur rol en ambities die höbbe. ’t Provinciaol bestuur vaan Veldeke Limburg geit ziech binnekort in eder geval buige euver ‘nen teks boe-in de provincie vaan advies weurt veurzeen. Dao-aon veuraofgaond vraog ’t provinciaol bestuur aon alle lokaal kring um ouch vaanoet hun positie aon te geve wat zie nudeg höbbe es ’t um ’t beleid vaan de provincie geit.

← Ga terug