Aondach veur ’t Limburgs in De Limburger

Vaanaof volgend jaor jannewarie versjijnt in De Limburger eine kier per maond ‘ne pagina dee gans aon eus Limburgse taol gewijd zien. Dao koume artiekele te stoon en verhaole, rubrieke en wat wijer de meujte vaan ’t wete euver de Limburgse taol weerd is. Hoofthema is de beteikenis en ’t gebruuk vaan de Limburgse taol in ’t daogeleks leve.

Dat is ’t rizzeltaot vaan ’n samewèrking tösse de gezèt, ’t Hoes veur de Kunste en de taolorganisaties Veldeke Limburg en Levende Talen Limburgs. Edere lèste goonsdag vaan de maond kump ‘nen anderen doelgróp in beeld mèt de vraog wie me umgeit mèt ’t gebruuk vaan ’t Limburgs in werk of umgeving. Es ierste is – en dat is neet touwvalleg – de gróp wèrkers in de zörg aon de beurt.

‘t Is veur ‘t iers sinds lang geleie tot de Limburger structureel aondach besteit aon de taol vaan e groet deil vaan zien lezers. Vreuger had Wim Kuipers zien vaste rubriek De Letterbak, en Frits Criens en Jan Sjure hadde hun dialekcolumn in bepaolde edities. Meh daonao is ‘t lang stèl gewees op ‘t Limburgs taolfroont in de gezèt.

Tot deen aondach veur ‘t Limburgs noe veurnaomelek in ‘t Nederlands oonder wäörd zal weure gebrach is um de artikele ouch begriepelek te hawwe veur lezers die ‘t dialek neet mechteg zien. Meh ’t is op ziech al wins tot euver eus taol gesjreve weurt en daoneve: in eder aoflievering zal op z’n mins ouch e stökske in ’t dialek te vinde zien, e gediech of e verhaol, ‘ne quiz of wat daan ouch.

De pagina heet nog geinen definitieve naom. Dus es geer e good idee höb daan laot ’t us ezzebleef wete.