Bezunder reisverhaole euver Limburg in ‘t verleie

Binnekort versjijnt e bezunder book mèt verhaole vaan reizegers oet binne- en boeteland die eus provincie bezeukde in de negetiende ieuw. In “Limburg door vreemde oogen” bezien vieftien sjrijvers en sjijfsters oet Nederland, Duitsland, Ingeland, Frankriek en de Vereinegde Staote Limburg door hunnen eige, subjectieve brèl en bringe dao – neet zoonder humor – verslaag vaan oet.

In de negetiende ieuw oontsteit ‘t massatoerisme. De welvaart nump touw. Goojekoupe en vlotte verveursmiddele, wie d’n trein, weure geïntroduceerd. ‘nen Daag drop oet is veur väöl lui bereikbaar gewore. ‘t Leefs bleef d’n toeris is eige land meh heer wouw wel get beleve. Binne Nederland waor Limburg de mies exotische provincie vaan alle landsdeile. ‘t Heuvelland mèt zien “berg” en grotte en vlotstruimende beekskes waor vaan ‘n groete aontrèkkingskrach. Limburg waor daoneve ‘n oetgesproke katholieke streek mèt kloesters en kapelle en echte kluizeneers. Stei wie Venlo, Remund en Mestreech hadde sjoen monuminte. In Valkeberg spraok de romantische ruïne tot de verbeelding. De historie vaan Limburg week aof vaan die vaan Noord-Nederland. LImburgers voolte ziech mie Belsj es Nederlander. En ze spraoke ouch nog ‘n “oonverstaonbaar” Limburgs. Duits en Frans waore neve ‘t Nederlands evezoe prominent aonwezeg. Limburg is e vreemp zusterke, concludeert Samuel Kalf anno 1900. Meh ouch: Limburg kinne is Limburg beminne!

“Limburg door vreemde oogen” is tot 1 juli tegen intekenprijs van 35 euro (inclusief bezorging) te bestellen. Zuug daoveur: https://www.leonvandorp.nl/boeken/reisverhalen. Daarna kost het boek € 39,50.

 

← Ga terug