Biografische informatie over Phil Schaeken

Phil Schaeken is op 3 mei 1950 in Lömmerich gebaore, mer woont al vanaaf zien driede in Zitterd. Es kèndj gruide hae op in ‘t centrum, op d’n Aw Mert, taegeneuver de basiliek. In de jaore 60 haet hae in Zitterd ‘t Kleesj aafgemaak (HBS A) en daonao de Pedagogische Academie (de kweeksjool ). Vervolges haet hae 41 jaor in ‘t basisóngerwies gewirk.

Hae is al 44 jaor getrouwd mit Hannie Jetten, haet twee zeuns en is opa van 4 kleinkènjer. Al vanaaf zien 18de sjrif ‘r gedichte, zowaal in ‘t Holles es in ‘t plat. Die gaon neit allein euver typisch Limburgse óngerwerpe wie sjötterieje, vastelaovend en ‘bronsgroen eikenhout’, mer veural euver actuele, soms politieke óngerwerpe. Dèkser sjprik d’r ein protes oet.

Zien interesses gaon oet nao historie, kuns, cultuur, in de breidste zin van ‘t woord, en taal. Vastelaovend haet ziene bezunjere aandach en hiebie ó.a. ‘t sjrieve van vastelaovesleidjes. Hae sjtóng drie keer in de finale van ‘t LVK, wobie hae in november 1976 in De Hanenhof in Gelaen bie ‘t eesjte LVK achter Vaan Eysde tot de Mokerhei tweede woort. In ‘t verlede haet hae in allerlei redacties gezaete, van sjoolblaad pès wiekblaad, van parochieblaad pès vastelaovesgezèt.

Zien gedichte versjene in tiedsjrifte wie Voetbal International, ‘t vereinigingsblaad van Veldeke, in Zitterd in de jaorlikse glossy bie Wèntjerdruim, mer ouch in de gezèt en in de buiker Limburgs eige (1995), Mosaiek Deil 12 (2001), Taal in stad en land (2002), Leefste (2007), Veertig Zittesje verhaole, gedichte en leidjes ( 2008 ), Nederland meertalendland (2009), D’r Hergod versjteed óch plat (2010), de serie Platbook, Vastelaovend mit de Marotte (2013), in het Historisch jaarboek van het Land van Zwentibold en in het jubileiumbouk 50 jaar Kennedymars Sittard (2013). Regelmaotig verschient van häöm ein gedich op de site van Sittard Creatief en in de serie Veldgewas.

Tensjlotte: De gemeinte Zitterd-Gelaen grens aan Belsj en Dutsjlandj. Bie Phil is dat trök te vènje in ‘t feit dat ziene opa van pap ziene kantj oet Belsj koum (hae haet dan ouch de Hollese en Belsje nationaliteit), terwiel zien euvergrootmoder, van mam häöre kant, ein Dutsje waar. Ein sjtökske Euregionale historie maag me waal zègke !

Zitterds