Book vaan Marjorie Rieu vertaold in ’t Mestreechs

‘Druime weure woer’ is de Mestreechsen titel vaan ’t book wat Marjorie Rieu gesjreve heet euver ’t bezeuk vaan ‘nen idolaten twierling aon ’t orkes vaan häöre maan André. Dat book waor al ieder vertaold in versjèllende taole, meh Mestreechs oontbraok nog. Hortense Brounts en häör broor Bèr höbbe ziech noe naomens Veldeke in de boch gegoejd um de nogal ins extatische taol vaan twie tienermeidekes in good Mestreechs um te zètte.

Ierste exemplaar veur börgemeister Hillenaar

’t Ierste exemplaar woort op goonsdag 11 oktober tijdens ’n rippetitie vaan ’t Johann Strauss Orkes door André Rieu euverhandeg aon de nuie börgemeister Hillenaar vaan Mestreech. Dee kraog metein te hure tot heer mer good mós oefene um Mestreechs te liere en tot dit book dao alliech bij kós helpe. De börgemeister zóng in eder geval al enthouisas mèt wie ’t orkes ‘Mestreech is neet breid meh laank’ inzat. En ouch ‘Daan kom iech mer aon’ vaan John Tana góng häöm vlot aof.

Korten inhaajd

’t Book ‘Druime weure woer’ handelt euver Ramona en Rebecca, ‘nen twierling in de puberleeftied, die bij eder conzèr vaan André Rieu wat ze kinne bezeuke väöraon stoon. Op e gegeve momint trèkke ze de stoute sjeun aon en sjrieve e mailke nao André mèt de vraog of ze neet ins bij ’n rippetitie mage zien. Tot hun verrassing kriege ze metein antwoord vaan Marjorie tot ze welkom zien. En daan koume de twie terech in ‘ne rollercoaster vaan bezeukskes aon Mestreech, in ’t kestiel vaan André, bij ’n rippetitie en oeteindelek bij e conzèr op de Vriethof, boebij ze ouch nog backstage mage roondloupe. En de lezer krijg op die meneer e good beeld vaan wie ’t achter de coulieze vaan ’t orkes draon touw get.

Bestèlle

Druime weure woer is prachteg vörmgegeve mèt ’n hel kaf en väöl foto’s. ’t Is te koup via Bookhandel Dominicane in Mestreech en binnekort ouch te bestèlle via de webshop vaan André Rieu. De pries is € 19,95.