Broebels: theaterveurstèlling vaan moojer en dochter in ’t Heldens dialek

In oktober vaan verleie jaor höbbe Ann Philipsen en häör moojer ’t plan opgevat um ’n theaterveurstèlling te make nao aonleiing vaan ’n intensief proces wat zie same höbbe doorgemaak. Zie voonte ’t de meujte weerd um die ervaring te deile umtot ’t universeel thema’s betröf boe väöl lui mèt worstele, of lever die ze oonder ‘t karpèt sjuive.’t Is ’n bezunder, emotioneel, confronterende veurstèlling gewore boe-in ouch zeker get te lache vèlt.

’t Stök hèt Broebels en weurt door hun zelf gespäöld in ’t Limburgs dialek vaan Helde. Umtot dat de taol is die hun ’t mies aon ’t hart ligk en ze heimèt hope optimaal verbinding mèt lui te make um zoe hun intenties euver te bringe. Broebels is ’n ego-documint gewore, vörmgegeve in ’n aofwisseling vaan teks, bewegingsspeul, meziek en beeld. ’n Veurstèlling um te bekieke, te beluustere en te veule. De veurstèlling weurt ouch door Toneelhoes LFA en de provincie Limburg gewaardeerd es e “bezunder initiatief”. Ann Philipsen heet veureg jaor ouch de cultuurpries én de publiekspries vaan de gemeinte Peel en Maas gewonne.

Op 8 juni j.l. heet de première vaan Broebels plaotsgevoonde in DOK 6 Theater in Panninge. De auteurs/acteurs waore euverweldeg door de reacties (en ’t applaus ) vaan ’t publiek. “Dat doog us good. ’n Teike tot eus bedoeling is euvergekoume én binnegekoume. ’t Heet väöl lui geraak”. In september en oktober stoon nog veurstèllinge gepland bij Theater De Garage in Venlo, de ECI Cultuurfebrik in Remund, Theater Karroessel in Geleen en ’t Pesthuyspodium in Mestreech. Meugelek koume dao nog mie speuldata bij.

D’n agenda en mie informatie is te vinden op de website vaan Broebels.

(Mestreechs)

 

← Ga terug