Column van Toon: Veer hawwe mótte vergaete

Ós kneije hawwe mótte riejere, van de kaw en van de alcohol. Veer hawwe ós aanein vas mótte klampe, óm te veurkómme dat veer sjpartelend van plezeier op de kaw centrumtegels zouwe belanje.

Zjwalkend hawwe veer door de sjtraote mótte zjwerve, veer hawwe ós eige sjpeigelbeelde in de etalaasjeroete mótte oetlache. De helverleichde etalaasjeroete, wo-achter de verleidelikste mannequins opgesjtèld sjtónge – ze zachte nooitsj get trök en daoróm ware ze de bèste vrouwluuj die me zich koosj bedènke. ‘Hydrateren doet begeren !’- dat hawwe veer mótte roupe. Veer hawwe op ós klikkerdeklikklakkende kneije mótte zakke en veer hawwe de paspóppe hikkend en grinnikend mótte vraoge of ze mit ós wouwe trouwe. Jao, dat hawwe veer mótte doon.

Veer hawwe ós óngerein mótte oetlache óm al dae sjaele kal, en hawwe alles metein weier mótte vergaete. Zelfs op dat woord hawwe veer neit mee mótte kómme, dat woord: vergaete. Veer hawwe ós weier in de meinigte mótte menge, de meinigte die sjtoïcijns door de kaw haer dampde en zjwèdde, op tralalameziek dae mer ein paar daag per jaor de sjoonste is.

Veer hawwe oet mótte gruije tot hyperbole van ószelf, belachelik rood, gael en gruin verkleide karikature, die ummer minder leke op wae veer tiedens de res van ‘t jaor ware. Veer hawwe ze welkom mótte heisje, de traone van intense gelökzeligheid, die inèns euver ós wange sjtruimde. Veer hawwe ós naze toe mótte kniepe en mótte sjprènge, wo-in haw neit oet mótte make. Ich zègk ‘t nóg èns: Veer hawwe ós aanein vas mótte griepe óm te veurkómme dat veer op de gróndj zouwe belanje, en veer hawwe dat metein weier mótte vergaete. Veer hawwe mótte bäöke van puur gelök.

In plaatsj daovan zaote veer gapend thoes veur die vervloukde beeldbuus. Veer herinnere ós jeder seconde van de inwisselbare beelde die dao aan ós veurbiesjote – jaomer genóg.

Door Phil Schaeken vanoet ‘t Holles euvergezat in ‘t Zittesj

 

← Ga terug