De avonture ván de Vleegende Pannenkook en de À-gebrande Kroket

Chris Winkelmolen oêt Hôrs án de Maas schreef ’n neej kiênderbook in ’t Hôrster plat en Sjors Driessen mákte dao de teikeninge beej. ’t Book beschrieft de spannende avonture ván ‘ne “Vleegende Pannekook” en ‘n “Á-gebrande Kroket”.

Às Ties óp ‘nen daag thoêskeumt en ’n kroket wil ópwerme, giët ’t gâns fout. De kroket brandt á en is nimmer te aete. Da ma ‘ne pannekook gebakke, daenkt Ties. Ma zaogauw di pannekook vaerig is, begint, tot groëte verwoondering ván Ties, di pannekook te zweve. De Á-gebrande Kroket springt óp de rug ván de pannekook en same vlege ze de raam oêt.

Zoë beginne de avonture ván dit apárte stêl. Óp eur reis gaon ze oonder ândere visse, ze kome á beej ’n reuzeraad, ze gaon met d’n trein en kome zelfs knats in Londen terêch. Daobeej speule twië persoëne ’n rol die elkes kier wer terugkeumt: de keuning, di verdacht vul op Willem-Alexander liekt, en de Boze Meneer. En die hebbe ‘r hand miêr às vôl àn de streke ván de Vleegende Pannekook en de  Á-gebrande Kroket.

Hiël bizoonder is, dát ’t book ni alliën in ’t plat wúrdt oêtgegaeve, ma ok in ’t Nederlands. Àllebei de beuk waere óp vriedág 20 september gepresenteerd in de bieb ván Hôrs. ’t Book is te koëp in Hôrs, ma ge kunt ’t ok bestelle via de website vur € 14,99.

← Ga terug