De nuie Veldgewas is oet

Veldgewas is e blaad veur en euver oos Taal, de Limburgse taal. Al mie es 10 jaor bringk Veldgewas Limburgstaolege gediechte en verhaole. Redacteur Wim Kuipers heet al deen tied zien bès gedoon auteurs te stimulere in ‘t Limburgs te sjrieve. Dat heet hoonderde tekste opgelieverd die de meujte vaan ‘t leze mie es weerd zien en die geer kint bekieke in ‘t Veldgewas Arsjief De Moenik.

Opfrisbeurt

Meh Veldgewas waor ouch touw aon ‘n opfrisbeurt.  ’n Nui redactie heet ziech veurgenome mèt nui energie de Limburgstaolege literatuur op de buun te bringe. Dat hèlt op de ierste plaots in tot ’t uterlek vaan Veldgewas grondeg is aongepak zoetot veer noe kinne spreke vaan e riechteg onlinemagazine. Ouch höbbe veer ’n deil gerenommerde Limburgse sjrijvers bereid gevoonde regelmaoteg ’n bijdraog te lievere mèt hun gediechte en verhaole.

Num e (gratis) abonnemint

En veer zien acties gestart um mie lezers te intrèssere veur e (gratis) abonnemint op Veldgewas, wat inhèlt tot me eine kier per maond – ederskier es ’n nui editie oetkump – ‘ne Nuutsbreef krijg mèt informatie euver d’n inhaajd en mie nuits op ’t gebeed vaan literatuur en de Limburgse taol. Geer kint u daoveur insjrieve door e mailke te sjikke nao veldgewas@veldeke.net mèt de vermelling “abonnement”. Meh bekiek uuch iers ins de nuie Veldgewas vaan september 2023, daan wèt geer wat uuch te wachte steit. Es geer hei klik daan wijs ziech de weeg vaanzelf.