De Provincie praot wijer euver de Limburgse taol

Op vriedag 11 miert heet Esther van Loo (Veldeke Heerle en Levende Talen Limburgs) de Staotekemissie Cultuur en Sameleving vaan de provincie Limburg bijgepraot euver de winse vaan de Limburgse streektaolorganisaties veur de kortbije touwkoms. Ze heet daobij ’t belaank oonderstriep vaan ’t wegnumme vaan de kinnesachterstand euver de mieweerde vaan mietaolegheid en ’t deurzaam make vaan väöl initiatieve die op dit momint door vrijwèllegers weure oontploejd. Es streektaolorganisaties wèlle veer gere tot de provincie structureel middele vrijmaak veur de opriechting vaan ’n Hoes veur ’t Limburgs: ’n fysieke plaots boe ederein dee get wèlt wete euver of get wèlt doen mèt de Limburgse taol terech kint veur advies en oondersteuning.

Vaanoet versjèllende fracties woorte praktische vraoge gestèld nao aonleiing vaan Esthers bijdraag, beveurbeeld euver de gewinsde vestegingsplaots vaan ‘t Hoes veur ‘t Limburgs en euver de perceis financieel bijdraag die gevraog weurt. Verantwoordelek député Geert Gabriëls gaof aon tot dao zeker gein  spraoke is vaan oonwèl bij de Provincie, meh tot wel gekeke moot weure nao ’n financieel constructie boe-in maximaol gebruuk weurt gemaak vaan de middele die noe al besjikbaar zien. Daoneve adviseerde heer um – es de stöb vaan de gemeinteraodsverkezinge veur de zomer is goon ligke – ouch de gemeintes actief in ’t proces te betrèkke.

← Ga terug