De Soepsjtein en anger ‘waorgebeurde’ verhaole oet ‘t Jaegershoes

Begin volgend jaor waerd d’r ein nuuj book oetgebrach mit 19 prachtige Limburgse verhaole oet Zjwame en Boekkoel. Dees verhaole zin in de 60-er en 70-er jaore opgeteikend door aad-Zjwamer Giel Geraedts, baeter bekènd as Giel van Beize (1917-1998). Ze zin noe biejeingebrach door zienne zoon Wim Geraedts, dae mit hulp van een redaksiekemissie, d’r  ei sjoon book van haet gemaak.

Doeze Wullem

Ein deil vanne verhaole kómme van Willem Douzen (1887-1978) – baeter bekènd in Zjwame es Doeze Wullem. Ze gaon euver de sjpuchte die de pap van Doeze Wullem oethaolde óm ’t laeve get joeksiger te make door mennigein get luus inne pils te paote. Ouch door verhaole van anger Zjwamer en Boekkelder luuj haet Giel Geraedts zich laote insjpirere óm ’n verhaol te sjrieve of óm bepaolde verhaole aan te völle. Ze gaeve alles biejein ei good beeld van de tied róndj de veurlèste eewwèsseling.

Gans histories verantjwaord is ’t ouggetugeverhaol euver de eerste ottoos in Zjwame in julie 1898 en de verhaole van de bekènde dörpsfigure de Platte en Sjlechter Maan. Anger verhaole laote ein beeld zeen van versjillende (echte en gefantazeerde) dörpsfigure oet daen tied, mit häör gooj kantje, mer meis ouch mit häör zjwake kantje. Ein deil mit diverse kórtere of langere verhaole van eine Nooren Toom is es ein doorloupende raamvertèlling biejeingebrach en vórmp same ein groot verhaol. Dees vertèllinge gaeve ein nag get ajer tiedsbeeld van zo tösse 1870 en 1890.

De Soepsjtein

’t Tiettelverhaol vanne soepsjtein haet zelfs ouch nag waal get literaere beteikenis. ’t Van oorsjpróng aje volksverhaol euver eine soepsjtein kènt twee versies, lang geleje opgesjreve vanoet twee gedachtes: ’t same deile van eders ermood, en ’t zelf baeter wille waere door gebroek te make van dómmigheid van anger luuj. Dit Zjwaams verhaol haet aevel eine gans angere invalshook en haet meer weg van ein raamvertelling wo-in Doeze Wullem zie vader eine neet al te sjlumme, goodgeluivige Pruus vernäök, óm te kieke wie wied hae ken gaon mit ’t opbinje van zien verhaole. Ouch zin d’r drie sjprookjes in dit book opgenaome. Die sjloete aan biej anger vertèllinge oet de regio Limburg.

Book in twee tale

D’r sjtaon de neudige aaj historische fotoos in en wiejer ein teental teikeningen van de bekènde Veluwse wildjsjilder Nico Bulder. ’t Book is gesjreve in zowaal ’t Zjwaams as ouch in ’t Nederlands, zodet de miense die ’t Zjwaams neet mechtig zin ’t ouch kènne laeze; me krieg dus zogezag twee beuk veur de pries van ein!

Veurinteikene

’t Book versjient begin 2020. ’t Is ein gezamelikke oetgaaf vanne Milieu- en Heemkundevereniging Swalmen en de Heemkundevereniging Maas- en Swalmdal. De pries bedreug € 20,- biej veurinteikening (toet 1 december 2019); daonao is de pries € 25,-; exclusief eventuele verzendköste. ’t Veurinteikeformeleer ken hiej waere gedownload. Extra informasie is te kriege via info@mhvs.nl.

← Ga terug