Declamatiefinale Veldeke Limburg veur bazissjoolkinjer

Ein van de hoogfeeste van Veldeke Limburg is de jaorlikse declamatiefinale, dit jaor veur de derde keer op riej in DOK6 in Kepel (Panningen). Mer leefs 28 bazissjoolkinjer van groep 3 t/m 8, allemaol winnaars van de veurrunj op kringniveau, zote op deze werme middig mit häör eljers, opa’s, oma’s , breurkes, zöskes en wiejere aanhank netjes op tied inne zaal.

Kemissieveurzitter Henk Buskes heet ederein welkom en leet de prizzentasie euver aan Hans Jacobs, dae op zien sjprankelende meneer de kinjer nao veur reep, op häör gemaak sjtèlde, zorgde det d’r oppe tied ‘n applaus klónk en det d’r vaart zoot in ‘t programma. “Wo zitte die van Kèrkraoj, van Ech, van Weert, van Venlo van Remunj”? Ouch leet d’r kinjer vraoge sjtèlle aan de jury: Wie hèts dich?, Wie aad bös dich? Wo bös doe van? Dao kwome al den neet eerlikke antjwaorde op van juryveurzitter Hortense Brounts, en de anger lede Sef Peeters, Katja Henz, Anke Peters en Ton van de Wijngaard.

Die krege ‘t nag bès lestig, want ‘t nivo van de veurdrachte woor erg hoog. Geweun geniete woor ‘t veur de jury en zeker ouch veur de toesjouwers inne zaal. Ze krege te heure wie se ‘t mós aanpakke óm in bèd nag sjtiekem op dienne GSM te kènne kieke, wie ‘t toes geit es mam op dieet is, waat dich kèn gebeure es se oppe fiets zits te appe ónger ‘t verkeerseksame, woróm opa zienne verjäördig wilt euversjlaon, waat se duis eer se sjmorges opsjteis, det greun vingers toch ech paekzjwart zin en woróm ós Limburgs ein wereldtaal is.

Tiedes ‘t juryberaod zóng Niels Sievers (14 jaor) oet Zitterd drie Limburgse liedjes: Geneit van ‘t laeve, Zitterd allein en Wie ich nag ‘n jungske waas. Hae begelèdje zichzelf daobiej oppe gitaar.

Juryveurzitter Hortense Brounts maakde róndj half veer de oetsjlaag bekènd.

Groep 3 en 4

1e: Tom Senden oet Kèrkraoj mit Sjpoeëk
2e: Lisa Wolter oet Venlo mit Op de kermis
3e: Fenne Höppner oet Nederweert mit De ballon

Groep 5 en 6

1e: Evena Kraanen oet Zöstere mit Oos Limburgs
2e: Jop Gubbels oet Venlo mit Vlege
3e: Thijmen Höppner oet Nederweert mit Stappe

Groep 7 en 8

1e: Lieke Delissen oet Pey mit Ein appje teväöl
2e: Sofie Zeegers oet Herten mit ‘t Heurapparaat
3e: Sjuul Camp oet Nederweert mit Rommel

Veur de winnaars woor d’r ‘n sjoon Veldeketrofee en alle kinjer krege naeve ‘n nette oorkonde nag ‘n Veldeke-jeu de boulesset.

Veur ‘n oetgebreide fotoreportaasj mèt foto’s vaan alle deilnummers, klik geer hei.

← Ga terug