Democratisch spelle volgens Leonie Cornips

Professor Leonie Cornips heet, in häöre column in de gezèt De Limburger, veurgestèld um de discussie euver de spelling vaan de Limburgse taol ‘ne nuien impuls te geve door ederein (en in ‘t bezunder de jong lui) op te rope in ‘t Limburgs te sjrieve op de meneer boe-op heer of zie dat wèlt, dus zoonder rekening te hawwe mèt de (veur sommege meujeleke) spellingsregels. Die praktijk zal daan gemonitord weurde mèt e wetensjappelek oonderzeuk wat alle meugeleke spellingswijze vaslègk en op orde bringk. Op basis vaan de oetkomste daovaan kin daan ‘n spellingsfrequentie weurde opgestèld. De mies veurkoumende spellingswijze kinne daan per woord weurde ingebouwd in de gebruukde teksverwèrkingsprograms en oeteindelek oetloupe op ‘ne spellingschecker of e woordebook. Leonie Cornips neump häören aonpak “democratisch spelle”.

Professor Cornips riech ziech in ‘t bezunder op de jong Limburgers umtot ieder oonderzeuk oetwijs tot die in de daogelekse praktijk vaan app-e en sms-e dèkser gebruuk make vaan Limburgs es taol. Die jong lui stoete daan op de väöl aksente die in ‘t Limburgs gebrukelek zien um de klaankriekdom en klaankdiversiteit vaan de Limburgse dialekte oet te drökke. ‘t Opzeuke daovaan kos te väöl tied op ‘ne smartphone of tablet en weurt daorum veur ‘t gemaak euvergeslage. Leonie Cornips lègk de naodrök drop tot häör veurstèl neet de bedoeling heet de spelling vaan ‘t Limburgs aon te passe of te vereinvoudege. In häör wäörd: ” ‘t Gief ederein zjus mie ermslaag bij ‘t spelle. Mèt dees innovatie – democratisch spelle – zouw Limburg aon d’n Europesen top stoon vaan ‘t digitaol oondersteune vaan minderheidstaole. Député Ger koopmans heet ‘t veurstèl vaan Leonie Cornips neve ziech neergelag.

← Ga terug