Derde Lou Spronck lezing: Geboorte en doed vaan ‘t Mestreechs

De lierstool Taolcultuur in Limburg vaan de Universiteit vaan Mestreech organiseert dit jaor veur d’n derde kier de Lou Spronck lezing. Op vriedag 16 oktober 2020 zal dr. Michel de Vaan zie leech laote sjijne euver ‘t verleie en d’n touwkoms vaan de Mestreechter taol.

Me leus allewijl regelmaoteg euver “oetstervende” dialekte in Belsj-Limburg en ‘t Rijnland. Geit dat ouch op veur ‘t Mestreechs? Es historisch taolkundege zal Michel de Vaan ziech in dees lezing concentrere op de hooflijne vaan de oontwikkeling vaan ‘t Mestreechs tösse 1200 en 2000 en de verhawding vaan ‘t Mestreechs tegeneuver ander Limburgse dialekte. Wie mote veer us veurstèlle tot zoeget wie ‘t Mestreechs oets oontstande is? En wie geit, op ‘n ander moment, de verdwijning vaan e stadsdialek daan in zie werk?

Veur antwoorde op die vraoge kinne veer terech bij studies nao dialekverandering örgens anders in Europa. De competitie tösse stadsdialek, regiolect en standaardtaol, in mondeling en soms ouch sjrifteleke vörm, is neet uniek veur Mestreech. ‘n Dergeleke situatie kint in taolkundeg opziech erg dynamisch zien meh op de sprekers toch ‘ne stabielen indrök make. ‘n Veurspelling euver “of” en “wienie” ‘t Mestreechs oetstörf, is daan ouch ‘n benkeleke zaak.

Dr. Michel de Vaan is privaat-docent Historische taolkunde aon de universiteite vaan Lausanne, Bern en Genève. Zien lezing vint plaots in d’n Turnzaol vaan d’n Hof vaan Tilly aon de Groete Grach 90-92 in Mestreech. Geer kint uuch aonmelle via dit e-mail adres: secr.hislk@maastrichtuniversity.nl. Vaanwege corona is mer e beperk aontal plaotse besjikbaar.

 

← Ga terug