Dialek spreke mèt dien kinder waor obbins fout

Zelfs Lei Pennings, ex-veurzitter vaan dialekvereineging Veldeke Limburg, leet ziech begin jaore tachteg vaan de veurege iew verleie um thoes Nederlands te goon praote mèt zien kinder. Onderzeuk zouw naomelek beweze höbbe tot dialek spreke de taolbekwaomheid vaan kinder naodeileg beinvloodt. Niks in minder woer, bleek achteraof. Meh ’t koed waor gebäörd: väöl Limburgse awwers die ummertouw dialek hadde gesproke, sjakelde euver op Nederlands um hun kinder neet te kort te doen. Lei Pennings heet noe wel degelek spiet daovaan.

‘t Limburgs kraog ‘ne geweldege knaw

Dat bliek oet ’n duo-interview mèt Lei en zien dochter Manon in Rabo &Co, ’t relatiemagazine vaan de Limburgse Rabobaanke. Manon heet zoe noets dialek liere praote en kint die taol ouch neet mie doorgeve aon häör eige kinder. Umtot dao väöl hoeshawwes waore boe-in die situatie ziech veurdoog, heet ’t Limburgs ’ne geweldege knaw gehad. En al heet wereldwied oonderzeuk oondertösse aofdoonde beweze tot mietalegheid in de opveujing – boebij ouch dialek es twiede taol mèttèlt – ‘ne positieven invlood heet op de oontwikkeling vaan kinder, is ’n ganse ginneratie Limburgse jáög opgegreujd mèt Nederlands es ierste taol.

De Rabobaank waor zoe vruntelek Veldeke touwstumming te geve ’t compleet interview mèt Lei en Manon Pennings op euze website te plaotse. Geer kint ‘t hei bekieke.