Dialekaovend aon de Universiteit vaan Hasselt

De Limburgse taol steit in Belsj Limburg zwoerder oonder drök es in Nederland. Dat heet oonder mie te make mèt ’t oontbreke vaan steun vaanoet de euverheid. Meh dat wèlt neet zègke tot ’t dialek hielemaol geine steun krijg.

De universiteit vaan Hasselt dreug de Limburgse dialekte in ’t hart. Daorum nudeg ze aof en touw ‘ne gasspreker oet um ’n huurcolleesj te geve in de streektaol. E paar maond geleie waor ’t woord aon journalis Patrick Martens.

Veur ’t vijfde huurcolleesj is Willy Claes oetgenudeg, de Minister vaan Staot. Heer bringk zien oeteinzètting oonder d’n titel: “USA tege China, ‘ne nuie kawwen oorlog?” Heer deit dat in zien moojertaol, ‘t Hasselts. Tössedoor weure Hasseltse leedjes gebrach door ’t ensemble Goefolk.

D’n touwgaank is gratis en achteraof weurt ’n klein receptie aongebooje um nao te praote. D’n dialekaovend vint plaots op dinsdag 8 oktober 2019 en begint um 19.30 oor. Plaots vaan samekoms is de Campus Oude Gevangenis, Auditorium Louis Roppe aon de Martelarenlaan 42 in Hasselt.

 

← Ga terug