Dialekaovendj Veldeke Krink Ech-Zöstere: Es de s(j)terre s(j)traole

Ónger dae titel, Es de s(j)terre s(j)traole… *), zal  op dónderdig 17 oktoaber a.s. vanaaf 20.00 oer  in de Hermeniezaal in Zöstere väör de viefde kieër ‘ne aovendj geprissenteerdj waere mit meziek en väördrachte vanoet versjillendje kerne van de gemèndje Ech-Zöstere. Ouch noe weer liktj de organisatie van deze aovendj in henj van de samewèrkendje dialek- en heemvereniginge Veldeke Krink Ech en de Vereniging van Natuurvrienden oet Zöstere.

De leje van dees vereniginge, mer ouch alle anger belangstèllendje zeen van herte oetgenuuedigdj óm d’rbie te zeen. De entree bedreug väör ederein 5 euro, aan de kassa.

De väörgaondje edities van “S(j)terre S(j)traole” wore allemaol ’n succes. De verrassendje aafwisseling van meziek en väördrach maaktj d’r ‘ne óntspannendje aovendj van. En de bekèndje en minder bekèndje jónger en aojer artieste laote zich van hunne bèste kant zeen. Wie väörige kieër: Spic en Span mit minder bekèndje, röstige leedjes en Ria Renet mit de sketch äöver ziene “onzichbare hóndj”.

Dees kieër staon o.a. Averegs, Linda Koolen en oet de Nuujsjtadt de Rivella Boys (foto) op ’t programma.  Väörgaonde edities van “S(j)terre S(j)traole” kóste al raekene op ‘ne volle zaal, mer in de Hermeniezaal is plaats genóg. Kómtj dus gerösj weer en vraogtj minse óm ouch èns mit te kómme loestere nao dees pareltjes van Limburgse cultuur.

*) Woróm die “j” tösse häökskes?In Ech zaet  m’n “sterre” en “straole”. In Zöstere zitj in de oetspraok dao dudelik die “j” tösje: “sjterre” en “sjtraole” dus.

← Ga terug