Digitalisere es of ‘t gedrök steit

’t Provinciaol bestuur vaan Veldeke Limburg heet ziech veurgenome de communicatie mèt zien lede te stroumlijne. E belaankriek oonderdeil daovaan besteit oet ’t digitalisere vaan de veurnaomste publicaties, te wete ’t Jaorbook en de Nuutsbreef. De ierste editie vaan deen digitale Nuutsbreef höb geer noe oonder ouge. Veer hope tot heer uuch bevèlt. Door te digitalisere kinne veer de frequentie vaan de Nuutsbreef opsjrouve vaan 2 kier nao 4 kier per jaor. Wee de Nuutsbreef lever op pepier wèlt leze, krijg twie kier per jaor (in de zomer en in de winter) ’n geprinte kopie vaan de twie Nuutsbreve die tot daan touw versjene zien. ’t Jaorbook weurt dit jaor nog in de aw oplage gedrök meh ouch dao-in goon veer volgend jaor snije aofhaankelek vaan ’t aontal lede wat de veurkäör gief aon drökwerk boven ’n digitaal versie.

Um dat proces in gaank te zètte heet ’t bestuur in november vaan verleie jaor ‘ne breef doen oetgoon nao alle lede mèt ’t verzeuk aon te geve wie me die publicaties ’t leefs zouw wèlle oontvaange: digitaal per mail of gedrök per pos. Op dee breef reageerde get mie es de helf vaan alle aongesjreve lede. Dat veel evekes tege. Naotot nog ‘ne rappelbreef mèt dezelfde vraog waor oetgegaange, reageerde nog flink get lede meh dao waoren ‘rs ouch nog hiel get die niks vaan ziech lete hure.

Wie veer in dee lèste breef al hadde aongegeven, goon veer geine pos mie roondsjikke es veer neet zeker wete tot dee op pries weurt gestèld. Dus de lede die niks vaan ziech höbbe laote hure, oontvaange vaan noe aof aon ouch geine Nuutsbreef en vaanaof volgend jaor gei Jaorbook mie. Veer doen dat neet um te peste meh zuver oet euverweginge vaan efficiënt umgoon met eus en eur cent. Es iemes dee neet gereageerd heet de publicaties esnog wèlt oontvaange, kin heer of zie dat altied nog kinbaar make door ’t formuleer op me sjikke of door e mailke te sjikke nao redactie@veldeke.net.

Es veer aofgoon op de reacties die veer tot noe touw binne höbbe gekrege daan zuut de verdeiling vaan de veurkäör vaan de leden es volg oet:

·         Wèlt ’t Jaorbook lever gedrök :                 52%
·         Wèlt ’t Jaorbook digitaal :                         40%
·         Hoof gaaroet gei Jaorbook :                        8%
·         Wèlt de Nuutsbreef geprint :                     31%
·         Wèlt de Nuutsbreef digitaal :                    67%
·         Hoof gaaroet geine Nuutsbreef :                2%

Bij de Nuutsbreef zien d’r dudelek mie lede die de veurkäör geve aon digitaal (67%) es bij ’t Jaorbook (40%). Bij ’t Jaorbook wèlt nogal altied mie es de helf vaan de lede e gedrök exemplaar in de bös kriege. Veer zalle dao good rekening mèt hawwe. Meh vergis uuch neet: ouch es mer de helf vaan de lede ’t Jaorbook neet gedrök wèlt höbbe, lievert dat ’n aonzeenleke bespaoring in de koste op, neet allein vaan de drökkoste meh ouch vaan de portokoste, die ummertouw hoeger weure. Dat zien good verdeende cent die veer vaan noe aof aon kinne gebruke veur ander activiteite. En ’t zalle veural de lokaal kring zien die daovaan kinne profitere umtot e belaankriek deil vaan die cent in de pot vaan ’t Stimuleringsfonds kump, boe-op e beroop kin weure gedoon veur bezunder project op lokaal niveau.